ՀՀ պաշտպանության նախարար Սուրեն Պապիկյանը հայտարարել է, որ սեպտեմբերի 13-14-ը ադրբեջանական զինուժի ագրեսիայի հետևանքով զոհվածների վերջնական թիվը կհրապարակվի նույնականացման ավարտից հետո։ «Նախ տվյալները հրապարակվում են Զինվորների ապահովագրության հիմնադրամում, երբ դրանք ամբողջությամբ բացահայտվեն, այնտեղ կհրապարակվեն»,- ասել է նախարարը՝ պատասխանելով «Ազատություն» ռադիոկայանի հարցին։ Վերջին տվյալներով՝ Զինվորների ապահովագրության հիմնադրամը փոխհատուցում է վճարել սեպտեմբերի 13-14-ի մարտերում զոհված 93 զինծառայողների ընտանիքներին։ Ցանկը ժամանակ առ ժամանակ թարմացվում է։ Պաշտպանության նախարարությունը սեպտեմբերյան իրադարձություններից ի վեր չի հրապարակել զոհերի հաստատված թիվը՝ նշելով միայն, որ զոհվածների և անհետ կորածների ընդհանուր թիվը 210 է: Այդ թիվ չի թարմացվել վարչապետի հոկտեմբերի 14-ի հայտարարությունից հետո։ Երեւանը պնդում է, որ Բաքուն խոչընդոտում է որոնողական աշխատանքներին։ Ադրբեջանը պաշտոնապես հայտնել է 80 զոհի մասին։