«Ատրպատականն արթուն է, հեղափոխությանը նեցուկ է». պաստառ՝ Ռայիսիի Թավրիզ այցի ժամանակ

Իրանի նախագահ Էբրահիմ Ռայիսի՝ Թավրիզ այցելության ժամանակ նրա բացօթյա հանրային ելույթի համար նախատեսված բեմահարթակի վրա ատրպատականյան թյուրքերենով գրված է՝ «Ատրպատականն արթուն է, հեղափոխությանը նեցուկ է»։ Այս մասին գրել է արևելագետ Վարդան Ոսկանյանը:

«Հետաքրքիր է, արդյոք, հնարավո՞ր է, որ Բաքվի բարբարոսական վարչախմբի պարագլխի՝ դիցուք, Լենքորան այցի ժամանակ որևէ հանրային՝ առավել ևս, սրա ելույթի համար նախատեսված, վայրում լինի թալիշերենով գրված ինչ-որ կարգախոս։

Հարցը, բնականաբար, հռետորական է, քանի որ արհեստածին Ադրբեջանում, պատկերավոր ասած, նույնիսկ մանրավաճառի կրպակի ցուցափեղկին թալիշերեն ցուցանակի տեղադրումը դաժանորեն պատժվում է։

Եվ սա այն ամենն է, ինչ պետք է իմանալ պարբերաբար, իբր, «հարավային ադրբեջանցիների»՝ Իրանում լեզվական և այլ իրավունքների մասին երեսպաշտորեն ճամարտակող Բաքվի բռնապետության իրականության մասին՝ արհեստածին մի կազմավորում, որի շրջանակներում բոլոր տեղաբնիկ ժողովուրդների նկատմամբ իրենց իսկ հայրենիքում գործադրվում է «սպիտակ ցեղասպանության» քաղաքականություն»,- գրել է Ոսկանյանը։