Բաքուն շրջանցում է Լաչինը. Ադրբեջանը Հայաստանին «քշում է» նոր միջանցք

Ադրբեջանի պետական ​​ավտոմոբիլային ճանապարհների գործակալությունը շարունակում է Լաչին քաղաքը շրջանցող նոր ճանապարհի շինարարությունը։ Նոր ճանապարհի երկարությունը 32 կմ է, երկկողմանի ավտոճանապարհի երթեւեկելի մասի լայնությունը՝ 7 մետր, ճանապարհի հունի լայնությունը՝ 12 մետր։

Այս մասին, այսօր՝ ապրիլի 21-ին, հայտնում է EADaily-ը՝ Ադրբեջանի ճանապարհային վարչությանը հղումով։

Ներկայումս ճանապարհի երկայնքով ընթանում են մեծածավալ շինարարական աշխատանքներ։ Նախագծին համապատասխան աշխատանքներ են տարվում ենթաշերտի պատրաստման և արհեստական ​​կառույցների տեղադրման ուղղությամբ։ Շինարարությանը ներգրավվել են անհրաժեշտ ուժեր՝ աշխատանքներն այս տարի ավարտին հասցնելու համար, նշել է գործակալությունից։

Միևնույն ժամանակ, չի նշվում, թե արդյոք այս նախագիծը կապ ունի նոր ճանապարհի հետ, որը, ըստ Ռուսաստանի, Ադրբեջանի և Հայաստանի ղեկավարների 2020 թվականի նոյեմբերի 9-ի եռակողմ հայտարարության, պետք է անցկացվի Հայաստանի և Լեռնային Ղարաբաղի միջև։

Հիշեցնենք, որ այս համաձայնագրի կետերից մեկը նախատեսում է, որ «առաջիկա երեք տարիների ընթացքում Լաչինի միջանցքի երկայնքով երթևեկության նոր երթուղու կառուցման պլան կսահմանվի, որը կապ կապահովի Լեռնային Ղարաբաղի և Հայաստանի միջև՝ ռուսական խաղաղապահ կոնտինգենտի հետագա վերաբաշխմամբ՝ ​​այս ճանապարհը պաշտպանելու համար»։ Արձանագրվել է նաև «Լաչինի միջանցքով երկու ուղղություններով քաղաքացիների, տրանսպորտային միջոցների և ապրանքների տեղաշարժի անվտանգությունը» երաշխավորելու Ադրբեջանի պարտավորությունը։