ՌԴ ԱԳՆ պաշտոնական ներկայացուցիչ Մարիա Զախարովան հույս ունի, որ Ռուսաստանի Դաշնության հետ համատեղ մշակված խաղաղության նախաձեռնությունները կյանքի կկոչվեն հայ-ադրբեջանական հակամարտության կարգավորման գործընթացում։ «Այս տարածաշրջանը բառացիորեն կարելի է անվանել հանգույց, մի տարածաշրջան, որտեղ դեռ հույս կա, որ խաղաղության նախաձեռնությունները, որոնք մշակվել են կողմերը Ռուսաստանի հետ միասին, կիրականացվեն»,- ասել է Զախարովան Sputnik ռադիոկայանի եթերում։ Նա անհարիր է որակել Հարավային Կովկաս ներթափանցելու Արևմուտքի փորձերը։ Նրա խոսքով, նման քաղաքականություն է իրականացվում ոչ թե հակամարտությունը կարգավորելու համար, այլ «ճիշտ հակառակ նպատակներով»։ «Դժբախտաբար, մենք երկար տարիներ այստեղ նկատում ենք նման միտում, այժմ արևմտյաններն է՛լ ավելի են ակտիվացել»,- նշեց նա։ Զախարովան նաև հայտարարել է, որ արևմտյան գործընկերների մասնակցությամբ հակամարտությունների կարգավորման հաջող օրինակներ չկան, մինչդեռ «հակամարտությունների թիվը ինչ-ինչ պատճառներով, հավաքական Արևմուտքի նախաձեռնությամբ, ավելանում է»։ «Ոչ ոք չի կարող ասել, որ ինչ-որ տեղ, որտեղ եղել է ոտքը, կամ ձեռքը, կամ հավաքական Արևմուտքի միտքը, այն ավելի լավն է դարձել»,- ընդգծել է ՌԴ ԱԳՆ պաշտոնական ներկայացուցիչը։