«Հարավկովկասյան երկաթուղիների» հետ պայմանագիրը խզելու հարց օրակարգում չկա։ Այսօր «Ի՞նչ անել-2 տնտեսական հեղափոխություն. ընկալումը եւ գործարկումը» գիտագործնական խորհրդաժողովի ընթացքում լրագրողների հետ զրույցում հայտարարեց ՀՀ փոխվարչապետ Մհեր Գրիգորյանը։ «Հայ-ռուսական քննարկումների օրակարգում է երկաթգծի ապագա զարգացումը եւ իրենց ռազմավարությունը։ Պայմանագիրը խզելու հարց ընդհանրապես չկա օրակարգում»,- ասաց Գրիգորյանը։ Հիշեցնենք, որ ռուսական մամուլն օրեր առաջ գրել էր, թե իբր «Ռուսական երկաթուղիներ» ընկերությունը պատրաստվում է Հայաստանի իշխանության հետ խզել պայմանագիրը։ Փոխվարչապետն անդրադարձավ նաեւ գազի սակագնի հնարավոր փոփոխություններին. «Ռուսաստանից գնվող գազի սակագինը բաղկացած է առնվազն 3 կարեւորագույն, ֆունդամենտալ բաղադրիչներից, գինը`սահմանին, հայկական «Գազպրոմ Արմենիայի» ներդրումային ծրագիրը եւ վերջինիս ընթացիկ ծախսերը: Երեք ուղղություններով էլ բանակցություններն ընթանում են, եւ դրանց արդյունքը կոչվում է գլխավոր սխեմա, որն այսօր եւս քննարկվում է»,- նշեց Գրիգորյանը՝ հավելելով, որ բանակցությունների ավարտի վերաբերյալ հստակ ժամկետ չի կարող նշել: «Ես կարծում եմ` շատ երկար չի տեւի, բայց կոնկրետ ժամկետ չնշեմ, որովհետեւ բանակցություններ են ընթանում, ամեն օր` նոր հարց, նոր պատասխան, նոր քննարկման տարր կարող է առաջանալ»,- ասաց փոխվարչապետը:
