Ստամբուլահայ աշխարհահռչակ տնտեսագետ Տարոն Աջեմօղլուն հերքել է օրեր առաջ թուրքական մամուլում հրապարակված լուրը իրեն նախարարի պաշտոն տալու հետ կապված։ Թուրքական Cumhuriyet պարբերականի փոխանցմամբ՝ Տարոն Աջեմօղլուն հայտարարել է, թե ինքը որեւէ առաջարկ չի ստացել ղեկավարելու Թուրքիայի էկոնոմիկայի նախարարությունը։ Նա պնդել է, թե թուրքական մամուլում հայտնված տեղեկությունները պարզապես բամբասանք են։ Տարոն Աջեմօղլուն անդրադառնալով Թուրքիայի տնտեսության վիճակին, շեշտել է, թե անհրաժեշտ են երկարաժամկետ կտրվածքով տնտեսական ծրագրեր։ Հայ տնտեսագետի խոսքով՝ Թուրքիայում ընտրությունների կայուն անցկացումը չի լուծում տնտեսության լավացման խնդիրը եւ որոշ կարեւորագույն ոլորտներում անկման ռիսկեր կան։ Նշենք, որ օրեր առաջ թուրքական մամուլում տեղեկություններ էր տարածվել, թե իբր Տարոն Աջեմօղլուն ղեկավարելու է Թուրքիայի էկոնոմիկայի նախարարությունը։
