Տիկին Ավանեսյան, եթե վիրավորվել եք՝ ներողություն եմ խնդրում. Արամ Վարդևանյան

ԱԺ "Հայաստան" խմբակցության պատգամավոր Արամ Վարդևանյանը ներողություն է խնդրել ՀՀ առողջապահության նախարար Անահիտ Ավանեսյանից.

«Երեկ ԱԺ-ում ճեպազրույցի ընթացքում բառացի ասել էի. «Սա ոչ միայն մասնագիտական տեսանկյունից է խայտառակություն, այլև լկտի վարքագիծ է կարգավիճակի և պաշտոնի նկատմամբ։ Մեկ ամիս է՝ Առողջապահության նախարարը չի ցանկանում արձագանքել իր անմիջական պարտականության կատարմանը։ Սա նաև մարդկայնորեն է ինձ համար անհասկանալի»:

Անձնական վիրավորական որևէ ձևակերպում բնական է, որ առկա չէ, դա իմ ոճը չէ: Սակայն տեղեկացա, որ տիկին Ավանեսյանը վիրավորվել է այդ արտահայտությունից:

Որևէ խնդիր կամ դժվարություն չունեմ կնոջից ներողություն խնդրելու: Դաստիարակությունս թույլ չի էլ տալիս այլ վարքագիծ: Ուղիղ դիմեմ. տիկին Ավանեսյան եթե վիրավորվել եք խոսքերիցս, ներողություն եմ խնդրում, դա առհասարակ կնամեծարության պահանջ է: Միաժամանակ մի շարք անհամաձայնություններս ու քննադատությունս չեն սահմանափակվելու»,- ասված է պատգամավորի  հայտարարության մեջ:

VERELQ-ը հիշեցնում է, որ Անահիտ Ավանեսյանն այսօր հայտարարել է, թե երեկ ԱԺ պատգամավորներից մեկը թե՛ պատգամավորին, թե՛ տղամարդուն անվայել արտահայտություններ էր թույլ տվել իր հասցեին, և ինքը հրապարակավ պահանջում է, որպեսզի նա ներողություն խնդրի:

«Իմ կողմից իրավական բոլոր գործիքներն օգտագործվելու են, որպեսզի նա պատիժ կրի իր
արտահայտությունների համար»,-ասել էր նախարարը: