Անցյալ տարվա ղարաբաղյան երկրորդ պատերազմում ՌԴ դաշնակիցը պարտվել է, Թուրքիայի դաշակիցը հաղթել: Սա առաջին դեպքն, երբ հետխորհրդային տարածաշրջանում այլ պետություն ներգրավվել է պատերազմում, որը մինչ այդ չէին անում ՌԴ-ին չնյարդայնացնելու համար: Այդ մասին այսօր՝ հոկտեմբերի 4-ին, մամուլի ասուլիսի ժամանակ հայտարարեց ՀՀ երկրորդ նախագահ, ընդդիմադիր «Հայաստան» դաշինքի առաջնորդ Ռոբերտ Քոչարյանը:
Նրա համար ակնհայտ է՝ Հայաստանը թուլացել է, գործոն չէ: «Ադրբեջանի դերն աճել է, աճել է Թուրքիայի դերը և սա ՌԴ-ն չի կարող հաշվի չառնել», - ասաց Քոչարյանն ու հավելեց՝ այս ամենի հետևանքը լինելու է այն, որ Ադրբեջանը էլ ավելի քիչ է փորձելու բալանսավորել իր հարաբերությունները Թուրքիայի ու ՌԴ-ի միջև՝ այդ ասիմետրիան թեքելով դեպի Թուրքիայի կողմը:
Նա անդրադարձավ նաև վարչապետ Նիկոլ Փաշինյանի հայտարարած «խաղաղության դարաշրջանի մասին»՝ համարելով դա անլուրջ ներկա իրավիճակում: «Հարց է առաջանում՝ իսկ դո՞ւ ով ես հիմա նման բան խոսելու և նման նախաձեռնությամբ հադես գալու: Հայաստանը բանակցային սեղանի շուրջ չէ, այլ վրա է, և իրեն են քնարկում առանց իր ներկայության: Դադարել ես լինել բանակցային սեղանի սուբյետ, այլ օբյեկտ ես», - ասաց նա:
Երկրորդ նախագահը նաև անհնար է համարում խաղաղության դարաշրջան բացել տարածաշրջանում, եթե «խաղաղություն չես կարող ապահովել քո երկրում, քո պետության սահմաններին»:
Ստեղծված փակուղուց ելքը, նրա խոսքով, իշխանափոխությունն է: «Ծնկների վրա բանակցելը հարմար չէ, լավ դիրք չէ: Չես կարող բանակցել մի մարդու հետ, որը ծաղրում է քեզ, դա չի ստացվի», - նկատեց Քոչարյանը:
Քոչարյանի խոսքով, այս իշխանությունները ադրբեջանական կողմի հետ բանակցությունների ժամանակ Արցախի կարգավիճակի մասին չեն խոսում, տեխնիկական հարցեր են քննարկում: «Կոմֆորտ տարածքում են իշխանությունները և չեն ուզում այլ խնդրի մասին խոսել: Այս ընթացքում ամեն օրը կորսված հնարավորություն է: Որոշ ժամանակ հետո մեր ժողովորդը սկսելու է մտածել, որ Արցախը ՌԴ-ի ու Ադրբեջանի միջև առկա խնդիր է, իսկ Հայաստանի կապը շատ միջնորդավորված է՝ հեռվից», - նկատեց նա:
Վերջում նա խոսեց նաև առաջիկայում սպսվող Հայաստանի և Ադրբեջանի ղեկավարների հնարավոր հանդիպման մասին: «Հարց է առաջանում՝ ի՞նչ պետք է խոսի Ալիևի հետ, երբ այն իրեն անվանել է հարբեցող ծաղրածու», - հարցադրում կատարեց Ռոբերտ Քոչարյանը:
