ԱՄՆ Ներկայացուցիչների պալատն ընդունեց Բաքվին ռազմգնությունը դադարեցնելու մասին որոշում

ԱՄՆ Ներկայացուցիչների պալատն ընդունել է կոնգրեսական Ֆրենկ Փալոնի կողմից ներկայացված լրացումը, որը դադարեցնում է ԱՄՆ-ի ռազմական օգնությունը Ադրբեջանին: Այս մասին հայտնում է ԱՄՆ Հայ դատի հանձնախումբը։

Մինչ լրացման ընդունումը Ֆրանկ Փալոնը հայտարարություն է տարածել, որում անդրադարձել է հուլիսի 28-ին հայ-ադրբեջանական սահմանի Գեղարքունիքի հատվածում Ադրբեջանի զինված ուժերի սադրիչ գործողություններին, որի հետևանքով 3 հայ զինծառայող է զոհվել․

«Ադրբեջանի այսօրվա հարձակումը հայկական հողերը զավթելու և երկրում ժողովրդավարությունը խաթարելու ծրագրի մի մասն է։ Եթե այս ագրեսիայի անտեսումը շարունակվի, նրանք կշարունակեն հարձակումները՝ մահացու ելքով։ Ներկայացուցիչների պալատի ծախսերում փոփոխության վերաբերյալ իմ առաջարկած նախագիծը ադրբեջանական ուժերի ֆինանսավորումը դադարեցնելու ազդակ է»,- նշել է Փալոնը։

Փալոնի ներկայացրած փոփոխության մեջ ասված է. «Միջազգային ռազմական կրթություն և ուսուցում», ինչպես նաեւ «Արտաքին ռազմական ֆինանսավորման ծրագրի» միջոցով հատկացվող որեւէ ֆինանսավորում չի տրամադրվելու Ադրբեջանին»:

Նշվում է, որ դրույթը չի արգելափակում հայեցողական ռազմական տեխնիկայի տրամադրումը, որը կարող է փոխանցվել Պաշտպանության դեպարտամենտի կողմից ԱՄՆ-ի օրենքների 333-րդ հոդվածի համաձայն:

Նշվում է, որ այժմ աշխատանքներ են տարվում նաեւ այդ ուղղությամբ: