Արագացված քննարկումներ և միանձնյա որոշումներ. ԱԺ-ում արտահերթ նիստ է

Կառավարության նախաձեռնությամբ այսօր՝ հուլիսի 15-ին, ԱԺ-ն արտահերթ նիստ է անցկացնում։ Օրակարգում չորս հարց է, որոնցից մեկը Ասիական զարգացման բանկի հետ վարկային համաձայնագրի վավերացման հարցն է։


Օրակարգում ընդգրկված են նաև 3 օրինագծեր, որոնցից երկուսի հեղինակը կառավարությունն է, մեկը՝ պատգամավորները։ Այսպես, կառավարության կողմից ներկայացվել են Վարչական իրավախախտումների վերաբերյալ օրենսգրքի փոփոխությունները, ինչպես նաև «Պետական տուրքի մասին» օրենքում փոփոխությունները։


«Իմ քայլը» իշխող դաշինքի պատգամավորներ Վիկտոր Ենգիբարյանը եւ Նիկոլայ Բաղդասարյանը ներկայացրել են «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքի փոփոխությունները: Բոլոր երեք օրինագծերն էլ արտահերթ նիստի նախաձեռնողներն առաջարկել են արագացված ռեժիմով քննարկել 24-ժամյա ռեժիմով:


Հիմնավորելով արագացված ռեժիմի անհրաժեշտությունը՝ էկոնոմիկայի նախարարի պաշտոնակատար Վահան Քերոբյանը նշել է, որ «Պետական տուրքի մասին» օրենքի փոփոխությունները կոչված են բարձրացնել ընդերքի պաշտպանվածության մակարդակը պղնձի և մոլիբդենի միջազգային գների էական բարձրացման լույսի ներքո։


Անդրադառնալով «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում փոփոխություններ կատարելու մասին պատգամավորների առաջարկած օրինագծին՝ Քերոբյանը նշեց, որ փոփոխություններով նախատեսվում է պատգամավորների ծախսերի փոխհատուցման ավելացում մինչեւ 250 հազար դրամ, ինչը կապված է «ընտրողների հետ պատգամավորների ավելի ակտիվ հանդիպումներ կազմակերպելու անհրաժեշտության հետ»: Քերոբյանը նշել է, որ փոփոխություններն ուժի մեջ են մտնում հաջորդ գումարման խորհրդարանի համար:


Մյուս օրեսնդրական փոփոխությունները, շարունակեց Քերոբյանը, միտված են առողջապահության և աշխատանքի տեսչության բնականոն գործունեության համար համապատասխան նախադրյալների ստեղծմանը, տեսչական մարմնի կողմից քննվող Վարչական իրավախախտումների ծավալի հստակեցմանը, ինչպես նաև օրենսդրության պահանջների պահպանման նկատմամբ պատշաճ հսկողության իրականացմանը:


Պատգամավորները կողմ են արտահայտվել արագացված ռեժիմին։ Կողմ է քվեարկել 72 պատգամավոր, դեմ՝ 1, ձեռնպահ՝ 0:


Նշենք, որ «յոթերորդ գումարման խորհրդարանի ավանդույթներին» համապատասխան՝ իշխող դաշինքը կքննարկի և օրակարգի հարցերը կընդունի միանձնյա։ Խորհրդարանական ընդդիմությունը՝ ի դեմս «Բարգավաճ Հայաստանի» և «Լուսավոր Հայաստանի», նիստին չի մասնակցում։

Տպել

Թեմայի այլ նորություններ
Загрузка...