Հայաստանում Ղազախստանի դեսպանն արժանացել է Բարեկամության շքանշանի

Հայաստանի և Ղազախստանի միջև քաղաքական երկխոսությունը դինամիկ զարգանում է՝ շարունակաբար հարստացնելով երկկողմ հարաբերությունների բովանդակությունը։

Այս մասին սեպտեմբերի 15-ին Հայաստանում Ղազախստանի դեսպան Բոլատ Իմանբաևի հետ հանդիպմանն ընդգծել է ԱԳ նախարար Արարատ Միրզոյանը՝ քննարկելով նաև տարածաշրջանում հաղորդակցությունների ընդլայնման հեռանկարները։

Հանդիպման ընթացքում զրուցակիցները մտքեր են փոխանակել երկու երկրների միջև տնտեսական կապերի խթանման հնարավորությունների շուրջ։ Այս համատեքստում առանձնահատուկ կարևորվել է օգոստոսի 8-ին Վաշինգտոնում ձեռք բերված պայմանավորվածությունների իրագործումը, որոնք ուղղված են տարածաշրջանում խաղաղության հաստատմանը և տրանսպորտային ցանցերի զարգացմանը։ Կողմերն անդրադարձել են նաև բարձրաստիճան փոխայցելությունների օրակարգային հարցերին։

Ի նշան երկու երկրների բարեկամական կապերի ամրապնդման գործում ներդրած նշանակալի ավանդի՝ Արարատ Միրզոյանը դեսպան Բոլատ Իմանբաևին հանձնել է Բարեկամության շքանշան։