ԱՄՆ-ն ողջունում է Ադրբեջանի կողմից հայ գերիների վերադարձը և գնահատում Ռուսաստանի ջանքերը

Միացյալ Նահանգները ողջունում է Ադրբեջանի կողմից հուլիսի 3-ին 15 հայ գերիների ազատ արձակումը և նրանց վերադարձը Հայաստան։ Մենք նաև ողջունում ենք մարդասիրական ականազերծումը դյուրացնելու նպատակով Ադրբեջանին տեղեկություններ փոխանցելու Հայաստանի որոշումը, հայտնում է ԱՄՆ դեսպանատան մամուլի ծառայությունը: 


Այս գործողությունները հաջորդեցին հունիսի 12-ին Ադրբեջանի կողմից հայ գերիների ազատ արձակմանը և մարդասիրական ականազերծումը դյուրացնելու նպատակով տեղեկություններ տրամադրելու Հայաստանի որոշմանը։ ԱՄՆ աջակցությամբ իրականացված այս քայլով, որին իր նպաստն էր բերել Վրաստանը, հիմք դրվեց Հայաստանի և Ադրբեջանի միջև հետագա համագործակցությանը։ Միացյալ Նահանգները նաև գնահատում է տարածաշրջանային կայունությանն աջակցելուն ուղղված Ռուսաստանի ջանքերը։


"Միացյալ Նահանգները շարունակում է կոչ անել վերադարձնել բոլոր գերիներին և փոխանակել հակամարտության շրջաններում արդյունավետ ականազերծում իրականացնելու համար անհրաժեշտ բոլոր տեղեկությունները։ Մենք պատրաստ ենք աջակցել համագործակցությանն ու տարածաշրջանում դեռևս չլուծված հարցերի կարգավորմանը։


Մենք նաև շարունակում ենք հորդորել Հայաստանին ու Ադրբեջանին վերականգնել առարկայական բանակցությունները ԵԱՀԿ Մինսկի խմբի համանախագահների հովանու ներքո՝ բանակցելով հակամարտության համապարփակ ու կայուն քաղաքական կարգավորումը", - ասված է հայտարարության մեջ։


VERELQ-ը հիշեցնում է, շաբաթ օրը Ադրբեջանի ԱԳՆ-ն հայտնել էր, որ Ռուսաստանի միջնորդությամբ Հայաստանին է փոխանցել 15 քաղաքացի՝ Ֆիզուլիի (Վարանդա) և Զանգելանի (Կովսական) շրջաններում ականապատ դաշտերի քարտեզի դիմաց:


 

Տպել

Թեմայի այլ նորություններ
Загрузка...