Եթե նրանք չլինեն՝ բանակն արագ կվերականգնվի. Սեյրան Օհանյան

ՀՀ պաշտպանության նախկին նախարար Սեյրան Օհանյանը կարծում է, որ շուրջ երեք տարի է պետք, որպեսզի բանակի վերազինման խնդիրներ կատարվեն այլ առաջնահերթ խնդիրներին զուգահեռ: Թեև հասկանալի է, որ հնարավոր չէ այդ կարճ ժամկետում անել այնքան, որքան 27 տարում։ 

«Բանակը եղել է և կա։ Եթե նրանք չլինեն (իշխանությունը)՝ բանակն արագ կվերականգնվի»,- շեշտեց նա:

«Բանակի զարգացման փուլերը մենք համապատասխանեցրել ենք պետական երկարաժամկետ կառավարման փուլերին: Ակնհայտ է, որ առկա պայմաններում անհրաժեշտ է իրականացնել արագ կազմակերպչական խնդիրներ՝ մեկ տարվա ընթացքում վերականգնել բանակի գործունեության ողջ ընթացքը, կարգապահությունը, և երեք տարի էլ պետք է, որպեսզի նաև վերազինման խնդիրները կատարենք: Մենք այնպիսի պայմաններում ենք, որ երկարաժամկետ կառավարման տեմպերը պետք է մի քիչ արագացնել», - Գորիսում լրագրողների հետ զրույցում ասաց «Հայաստան» դաշինքի անդամ Սեյրան Օհանյանը:  

Նա հավաստիացրեց, որ ընտրություններում հաղթելուց հետո շատ կարճ ժամանակում հաշվարկներ կանեն այս բոլոր հարցերի մասով, ինչպես նաև, թե որքան է ավելացել սահմանը, որից հետո էլ հնարավորինս սեղմ ժամկետում կզբաղվեն սահմանների ամրացման գործով: