ԱՄՆ դեսպանը Սյունիքում չի հանդիպել վարչապետ Փաշինյանի կամ նախագահ Սարգսյանի հետ. հերքում

Հայաստանում ԱՄՆ դեսպանատան մամուլի ծառայությունը հերքում է մամուլում տարածվող տեղեկություններն այն մասին, թե ապրիլին դեսպան Լին Թրեյսիի Սյունիք կատարած այցի ժամանակ հանդիպել է վարչապետ Փաշինյանի կամ նախագահ Սարգսյանի հետ։

«Վերջին շաբաթների ընթացքում մի քանի պարբերականներում նկատել ենք հրապարակումներ ապրիլին դեսպան Լին Թրեյսիի Սյունիք կատարած այցի վերաբերյալ, որոնցում ներկայացվում են սխալ տեղեկություններ։ Դեսպանի Սյունիք կատարած այցը այլ պաշտոնյաների այցերի հետ կապ չուներ, և Սյունիքում գտնվելու ընթացքում դեսպան Թրեյսին չի հանդիպել կամ խոսել վարչապետ Փաշինյանի կամ նախագահ Սարգսյանի հետ։

Ինչպես ավելի վաղ մենք հայտնել էինք, դեսպանը Սյունիքի մարզ էր մեկնել տեղի պաշտոնյաներից և ԱՄՆ դեսպանության ծրագրերի գործընկերներից անձամբ տեղեկանալու համավարակի և պատերազմի կրկնակի հարվածների հետևանքով ստեղծված իրավիճակի մասին։ Դեսպանը նաև հանդիպել էր ԱՄՆ կառավարության դրամաշնորհային ծրագրերի շահառուներին և քննարկել համագործակցության շարունակականությունը ապահովելու ուղիներն՝ ի աջակցություն Սյունիքի վերականգման ու զարգացման: Դեսպանի Սյունիք կատարած այցի մանրամասների համար տես՝ այստեղ», - ասված է մամուլի հաղորդագրությունում: