Մհեր Գրիգորյանը՝ Փաշինյանի ծրագրի մասին. շուտով կլինի և՛ արձագանք, և՛ գործողություն

ՀՀ փոխվարչապետի պաշտոնակատար Մհեր Գրիգորյանը վստահ է, որ առաջիկա օրերին ինչպես Բաքուն, այնպես էլ միջազգային հանրությունը կարձագանքի հայ-ադրբեջանական սահմանին ճգնաժամի հանգուցալուծման ծրագրին, որը հնչեցրել է վարչապետի պաշտոնակատար Նիկոլ Փաշինյանը մայիսի 27-ին Անվտանգության խորհրդի արտահերթ նիստում:

Փաշինյանն առաջարկում է ապահովել կողմերի զորքերի հայելային հեռացումը մշտական տեղակայման վայրեր, ինչպես նաև սահմանի երկայնքով միջազգային դիտորդների տեղակայումը: Այսօր՝ հունիսի 1-ին, լրագրողները հետաքրքրվեցին, թե որքան երկար է հայկական կողմը մտադիր սպասել երկրի ղեկավարության կողմից ներկայացված առաջարկներին:

«Մենք պետք է առավելագույն ջանքեր գործադրենք, որպեսզի խնդիրը լուծվի խաղաղ, դիվանագիտական ճանապարհով։ Եվ ես կարծում եմ, որ սա (Փաշինյանի ծրագիրը – խմբ.) ճիշտ մոտեցում է», - հայտարարել է Գրիգորյանը։

Նա ընդգծել է, որ արդյունքները կարեւոր են ներկայացված առաջարկների վերաբերյալ արձագանքներից եւ հայտարարություններից: Գրիգորյանը չհամաձայնեց լրագրողների այն գնահատականների հետ, թե միջազգային հանրությունը չի արձագանքել առաջարկներին։ «Կարծում եմ, որ շատ շուտով դուք բոլորդ կլսեք այդ հարցի վերաբերյալ արձագանքը», - վստահեցրել է նա:

Գրիգորյանը վստահ է, որ արձագանքը կհաջորդի նաև Բաքվից։ «Կարծում եմ, որ արձագանքը կլինի, չի կարող չլինել արձագանք և չեն կարող չլինել գործողություններ։ Ուզում եմ հավատալ, որ այդ հարցը հնարավոր կլինի լուծել դիվանագիտական ճանապարհով», - հայտարարել է նա։ Ճշտող հարցին, թե երբ դա սպասել, Գրիգորյանը նշեց. «Առաջիկա օրերին»: