Սերգեյ Շոյգուն և Վաղարշակ Հարությունյանը քննարկել են ընթացիկ «սուր խնդիրները»

ՌԴ պաշտպանության նախարար, բանակի գեներալ Սերգեյ Շոյգուի և նրա հայ գործընկեր Վաղարշակ Հարությունյանի միջև աշխատանքային հանդիպումը տեղի է ունեցել ուրբաթ օրը Մոսկվայում: Նրանք կքննարկեն ընթացիկ բոլոր սուր խնդիրները: Այս մասին հայտնում է «ՌԻԱ Նովոստի»-ն։

ՌԴ պաշտպանության նախարարն առաջարկել է քննարկել տարածաշրջանային անվտանգության հարցերը։ «Մենք կքննարկենք տարածաշրջանային անվտանգության հարցերը՝ կապված Լեռնային Ղարաբաղում խաղաղապահ ուժերի աշխատանքի հետ, բայց և, անկասկած, բոլոր սուր խնդիրները, որոնք ծագել են այս պահին», - ասել է Շոյգուն:

«Մենք այսօր կքննարկենք համագործակցության մեր բոլոր հարցերը, որոնք իմ գնահատմամբ շատ հաջող են զարգանում», - նշել է Հարությունյանը:

Բացելով հանդիպումը՝ Շոյգուն նշել է, որ Ռուսաստանն ու Հայաստանը ամրապնդում են ռազմական փոխգործակցությունը ինչպես երկկողմ ձևաչափով, այնպես էլ միջազգային կառույցների՝ առաջին հերթին ՀԱՊԿ-ի շրջանակներում:

«Հաջողությամբ իրականացվում են մեր զինված ուժերի միացյալ խմբավորման, ինչպես նաեւ Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգի ստեղծման համաձայնագրերը... երկկողմ համագործակցության բարձր մակարդակի ցուցանիշ է Հայաստանում 102-րդ ռուսական ռազմակայանի գործունեությունը, որը դիտարկում ենք որպես տարածաշրջանային անվտանգության ապահովման կարեւոր գործոն», - շարունակել է նա:

Շոյգուն շնորհավորել է Հարությունյանին և ողջ հայ ժողովրդին պետական տոնի՝ Հանրապետության օրվա կապակցությամբ:

«Ցանկանում եմ շնորհավորել Ձեզ ազգային տոնի առթիվ, որն այսօր նշում է ողջ հանրապետությունը, եւ այդ օրը դուք կարողացաք ժամանել Մոսկվա։ Դա խոսում է այն մասին, որ մեր երկրների միջեւ հարաբերությունները նախկինի պես շատ բարձր մակարդակի վրա են, եւ մեր ռազմավարական գործընկերությունը մենք շարունակում ենք զարգացնել եւ խորացնել»,-հայտարարել է նա։

Շոյգուն հիշեցրել է, որ հայկական բարձր մակարդակի ռազմական պատվիրակություններն ավանդաբար մասնակցում են Ռուսաստանի Պաշտպանության նախարարության նշանակալի միջոցառումներին: «Ուրախ կլինենք Ձեզ տեսնել միջազգային անվտանգության IX մոսկովյան համաժողովում, որը տեղի կունենա հունիսին», - ասել է նա:

«Օգոստոս-սեպտեմբերին սպասում ենք Հայաստանի Հանրապետության ներկայացուցիչներին Բանակային միջազգային խաղերին եւ «բանակ-2021» միջազգային ռազմատեխնիկական համաժողովին», - հավելել է Շոյգուն: