Փաշինյանը՝ Բայդենի ճանաչման մասին. կապված է այն նաև արցախյան խնդրի լուծման հետ

ԱԺ հատուկ նիստում պատգամավոր Արման Բաբաջանյանը հարցրեց վարչապետի պաշտոնակատար Նիկոլ Փաշինյանին․ «ԱՄՆ նախագահի կողմից Ցեղասպանության ճանաչման կապակցությամբ Հայաստանն ի՞նչ է պատրաստվում անել։ Արդյոք մենք հասկանո՞ւմ ենք, թե դա ինչպես կարող է ավելացնել մեր անվտանգության մակարդակը և ի՞նչ հնարավորություններ կարող է ստեղծել»։

Ի պատասխան Փաշինյանն ասաց, որ ԱՄՆ նախագահի կողմից ցեղասպանության ճանաչման հարցում կա 4 գործոն։

«Երկարաժամկետ գործոնը՝ միանշանակ ԱՄՆ հայկական համայնքի և Սփյուռքի հետևողական աշխատանքն է։ Միջնաժամկետ գործոնը Թուրքիայի տարածաշրջանային քաղաքականությունն է և այս համատեքստում դիսոնանսը, որն առաջացել է Թուրքիայի և ԱՄՆ միջև։ Կարճաժամկետ գործոնները երկուսն են՝ առաջինը՝ 44-օրյա պատերազմը և դրանում Թուրքիայի բացահայտ և ակտիվ ներգրավվածությունը։ Մյուս կարճաժամկետ գործոնը՝ ՀՀ ժողովրդավարական երկիր լինելը։ Այս 4 գործոններ են, իմ համոզմամբ, որ բերել են ԱՄՆ նախագահի կողմից այդ աննախադեպ և պատմական որոշման կայացմանը»,- ասաց նա։

Փաշինյանը նշեց, որ տեղի ունեցողը կապ ունի նաև ԼՂ հարցի և դրա հետագա կարգավորման հետ։ «Եվ եթե ԱՄՆ նախագահի կողմից Հայոց ցեղասպանության ճանաչման փաստին ավելացնենք այն մեկնաբանությունները, որ Ռուսաստանի Դաշնության նախագահը տվեց պատերազմից հետո՝ խոսելով Ղարաբաղի հարցի ծագումնաբանության և Արցախի հայության անվտանգության մասին, եթե սրան գումարենք նաև ԵԱՀԿ Մինսկի խմբի համանախագահների՝ պատերազմից հետո արված համատեղ երկրորդ հայտարարությունը, մենք կտեսնենք, որ այս բոլոր գործընթացները մեկը մյուսի հետ ունեն խորքային կապ։ Շատ կաևոր են նաև Ֆրանսիայի նախագահ Մակրոնի հայտարարությունները և այն գործընթացները, որոնք մենք տեսնում ենք Ֆրանսիայում»,- ասաց նա։

Ըստ Փաշինյանի՝ հարցը, թե այս առիթով ի՞նչ պատկերացում ունի ՀՀ կառավարությունը, չի ուզում բարձրաձայնել, բայց կարող են թեման խորհրդարանական ուժերի հետ քննարկել։