Երևանում երթուղայինում սպանություն է տեղի ունեցել՝ դիմակ չկրելու պատճառով

Այսօր՝ ապրիլի 14-ին, սպանություն է տեղի ունեցել Երևանում։ Ժամը 11.00-ին ոստիկանության Կենտրոնականի բաժնում հաղորդում է ստացվել, որ Երևանի Պարոնյան-Լեո փողոցների խաչմերուկում՝ թիվ 54 երթուղին սպասարկող «Գազել» երթուղայինում, դիակ է հայտնաբերվել:

Ինչպես դեպքի վայրից հայտնում է ֆոտոլրագրող Գագիկ Շամշյանը, ստիկանները հետեւի նստարանին տղամարդու դի են հայտնաբերել։ Նախնական տվյալներով՝ տղամարդը մահացել է մեկ այլ ուղեւորի կրծքին դանակի հարվածից։ Այս պահին դեպքի վայրում կատարվում է զննում:

Դեպքի առթիվ հարուցվել է քրեական գործ՝ ՀՀ քրեական օրենսգրքի 104-րդ հոդվածի 1-ին մասի հատկանիշներով: Կատարվում է նախաքննություն Ոստիկանությունը և քննչական բաժինը ձեռնարկում են անհրաժեշտ օպերատիվ-հետախուզական և քննչական գործողություններ՝ հանցագործություն կատարած անձին և հանցագործության գործիք հանդիսացող անձին հայտնաբերելու ուղղությամբ:

Դեպքի ականատեսները, որոնք հրաժարվել են խոսել տեսախցիկով, հայտնել են, որ սպանության պատճառը եղել է այն, որ սպանվածը խնդրել է իր կողքին նստած քաղաքացուն դիմակ հագնել, սակայն վերջինս հրաժարվել է, ապա դանակով հարվածել է նրան եւ դուրս եկել մեքենայից: