ԵԱՏՄ երկրների ղեկավարները հեռակա ձեւաչափով կհանդիպեն դեկտեմբերի 11-ին

Եվրասիական տնտեսական բարձրագույն խորհրդի նիստը, որտեղ հանդիպում են ԵԱՏՄ երկրների ղեկավարները, տեղի կունենա դեկտեմբերի 11-ին հեռակա ձևաչափով: Այս մասին ճեպազրույցի ընթացքում հայտնել է Եվրասիական տնտեսական հանձնաժողովի (ԵՏՀ) ղեկավարի օգնական Իյա Մալկինը, փոխանցում է ՏԱՍՍ-ը։

«Բարձրագույն խորհրդի նիստը նախատեսված է 2020 թվականի դեկտեմբերի 11-ին։ Հաշվի առնելով համաճարակաբանական իրավիճակը՝ միության անդամ պետությունները նախապատվությունը տալիս են դրա անցկացման հեռակա ձեւաչափին», - ասել է նա։

Ինչպես նշել է Մալկինան, Եվրասիական տնտեսական համաժողովը, որը, ենթադրվում էր, տեղի կունենա առկա ձեւաչափով 2020 թվականի դեկտեմբերին Մինսկում, չեղյալ է հայտարարվել: «Հաշվի առնելով համաճարակաբանական իրավիճակը՝ որոշում է կայացվել համաժողովը չանցկացնել 2020 թվականի դեկտեմբերին», - նշել է նա:

ԵԱՏՄ-ն տնտեսական ինտեգրման միջազգային կազմակերպություն է, որի կազմում են Ռուսաստանը, Հայաստանը, Բելառուսը, Ղազախստանը, Ղրղզստանը: ԵԱՏՄ վերազգային բարձրագույն մարմինը Եվրասիական տնտեսական բարձրագույն խորհուրդն է (ԵՏԲԽ), իսկ մշտապես գործող վերազգային կարգավորող մարմինը՝ Եվրասիական տնտեսական հանձնաժողովը:

ՀՆԱ-ի նվազում

Եվրասիական տնտեսական միության (ԵԱՏՄ) անդամ պետությունների ՀՆԱ-ի նվազումը 2020 թվականին կկազմի 3,9 տոկոս, հայտնել է Իյա Մալկինան: «Նորացված կանխատեսումների համաձայն՝ միության պետությունների ՀՆԱ-ն 2020 թվականին կկրճատվի մոտ 3,9 տոկոսով։ 2021 թ. ակնկալվում է 3,2% աճ ներքին և արտաքին պահանջարկի վերականգնման արդյունքում», - ասել է նա։

ԵՏՀ ղեկավարի օգնականը նշել է, որ արտաքին տնտեսական իրավիճակի վատթարացման դեպքում կավելանան ռիսկերը ԵԱՏՄ երկրների տնտեսությունների համար: «Միջնաժամկետ հատվածում տնտեսական աճի ռիսկերը մնում են ծայրահեղ անորոշ։ Եվ ավելի հավանական է, որ բացասական լինեն, քանի որ արտաքին պայմանների ցանկացած վատթարացում կհանգեցնի Եվրասիական տնտեսական միության տնտեսությունների, առաջին հերթին նավթ արտահանող երկրների համար ռիսկերի ավելացմանը», - նշել է նա։

Ավելի վաղ հաղորդվել էր, որ Եվրասիական տնտեսական միության երկրների ՀՆԱ-ն 2020 թվականին կարող է նվազել 3,2-7,2 տոկոսով կորոնավիրուսի համաճարակի պատճառով: