Կարծում եմ՝ ավելի շատ հեռախոսային զրույցներ կունենամ Ֆրանսիայի նախագահի հետ. Փաշինյան

Այս ամբողջ ընթացքում ես հեռախոսային խոսակցություններ եմ ունեցել Ֆրանսիայի նախագահի, Գերմանիայի կանցլերի, Իրանի Իսլամական Հանրապետության նախագահի և ՄԱԿ-ի Գլխավոր քարտուղարի հետ, երկու անգամ էլ` Վլադիմիր Պուտինի: Բայց ես կարծում եմ, որ ավելի շատ հեռախոսային զրույցներ կունենամ Ֆրանսիայի նախագահի հետ և այլ ղեկավարների, որպեսզի քննարկեմ ընթացիկ իրավիճակը և իրադարձությունների զարգացումը: Այս մասին «Ալ Ջազիրա»-ին տված հարցազրույցում հայտարարել է ՀՀ վարչապետ Նիկոլ Փաշինյանը:

Լրագրողի դիտարկմանը, թե՝ կարևորը Վլադիմիր Պուտինն է, այն, ինչ նա մտածում և ասում է արդյոք առավել կարևոր չէ, Նիկոլ Փաշինյանն ասել է. "Ռուսաստանը ԵԱՀԿ Մինսկի խմբի համանախագահ է: Ռուսաստանն ու Հայաստանն ունեն խորը համագործակցություն անվտանգության ոլորտում, ներառյալ Հայաստանում ռուսական ռազմաբազայի ներկայությունը: Կան գործող կոնկրետ համաձայնագրեր և, հնարավոր է, որ մեր երկխոսության օրակարգն այս առնչությամբ ավելի բազմազան է":

Հարցին՝  ցանկանո՞ւմ է, որպեսզի Մոսկվան լինի չեզոք, վարչապետն ասել է.

"Մեր դիրքորոշումն այն է, որ Ռուսաստանն առաջին հերթին համանախագահ երկիր է, և Մինսկի խումբն անում է բոլոր անհրաժեշտ քայլերը, որպեսզի խաղաղություն հաստատվի տարածաշրջանում և նպաստում է Ղարաբաղյան հարցի կարգավորմանը":

Ինչ վերաբերում է Ռուսաստանի խաղաղապահների տեղակայմանը Լեռնային Ղարաբաղում, Փաշինյանը հավելել է.

"Այդ հարցերը կարող են քննարկվել ավելի մեծ համատեքստում` ԵԱՀԿ Մինսկի խմբի համանախագահության շրջանակներում":