Կորոնավիրուսային հիվանդությամբ զբաղվող հիվանդանոցային մահճակալային առկա ֆոնդը դեռևս բավարար է, հաշվի առնելով նոր ծավալումները: Այդ մասին կորոնավիրուսային հիվանդությամբ զբաղվող բժշկական կազմակերպությունների ղեկավարների հետ հանդիպմանը հայտարարել է Առողջապահության նախարար Արսեն Թորոսյանը:
ԱՆ տեղեկատվության եւ հասարակայնության հետ կապերի վարչությունից հայտնում են, որ հանդիպման պատասխանատուները նախարարին ներկայացրել են ընթացիկ խնդիրները, ինչպես նաև քննարկել են առաջիկա անելիքները:
Նախարարը ներկաների ուշադրությունը հրավիրել է կենտրոնների ինֆորմացիոն հասանելիությանը, մասնավորապես` որքան ազատ և զբաղված մահճակալ կա:
«Հասկանալի է, որ հոսքերը շատ մեծ են, և ազատ մահճակալը կարող է շատ շուտ զբաղեցվել, սակայն կարևոր է նաև ինֆորմացիոն հասանելիությունը, որպեսզի դրա պատճառով որևէ մեկի բուժօգնությունը չուշանա»,- նշել է Արսեն Թորոսյանը:
Բուժհաստատությունների ղեկավարները փաստել են, որ մահճակալային ծանրաբեռնվածությունը հիմնականում բաժին է ընկնում վերակենդանացման բաժանմունքներին:
Նախարարն ընդգծել է, որ եթե նույնիսկ պահպանվի վերջին օրերի հիվանդության տեմպը, ապա կորոնավիրուսային հիվանդությամբ զբաղվող հիվանդանոցային մահճակալային առկա ֆոնդը դեռևս բավարար է, հաշվի առնելով նոր ծավալումները: Նա նաև կենտրոնների ղեկավարներին կոչ է արել հետևողական լինել պացիենտների բուժման ընթացքին և հատուկ ուշադրություն դարձնել դուրսրգրումներին:
ՀՀ-ում ծավալման աշխատանքների արդյունքում, ինչպես ավել վաղ հայտնել էր նախարար Թորոսյանը, կավելացվի մոտ 350 սովորական և ռեանիմացիոն մահճակալ: Նախարարի փոխանցմամբ՝ սա 15 տոկոսով ավելին է, քան այսօր գործում է։
Մինչ օրս կորոնավիրուսային հիվանդությանը սպասարկելու համար շուրջ 2000 մահճակալ է առանձնացվել, թվով 9-ը բժշկական հաստատություններում, որից 5-ը Երեւանում եւ 4-ը` մարզերում:
Նշենք, որ ավելի վաղ հայտնի դարձավ, որ ՀՀ-ում կա կորոնավիրուսային հիվանդությամբ 403 ծանր և 94 ծայրահեղ ծանր վիճակում գտնվող պացիենտ:
VERELQ-ը հիշեցնում է, որ Հայաստանում հունիսի 9-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 13675 դեպք, որոնցից 4451-ն` առողջացած, 217-ը` մահվան ելքով: Կորոնավիրուսային հիվանդությամբ այս պահին փաստացի բուժում է ստանում 8933 պացիենտ: Ընդհանուր առմամբ կատարվել է 71405 թեստավորում:
Հունիսի 9-ի դրությամբ ՀՀ-ում հաստատվել է կորոնավիրուսային հիվանդությամբ 350 նոր դեպք, մահվան 6 դեպք և 352 առողջացած։
