Տնտեսական բարձր ակտիվությունը մնաց անցյալում. նախարարը՝ նոր խնդրիների մասին

Այս տարվա առաջին եռամսյակի արդյունքով տնտեսական ակտիվությունը դրական դինամիկա է գրանցվել, քանի որ տնտեսությունը մարտ ամսի երկրորդ կեսին է սկսել կրել նոր կորոնավիրուսի տնտեսական բացասական ազդեցությունը: Ապրիլի 29-ին կառավարության մամուլի սրահում տեղի ունեցած ասուլիսի ժամանակ Էկոնոմիկայի նախարար Տիգրան Խաչատարյանն այսպես բացատրեց առաջին եռամսյակում արձանագրված տնետսական ակտիվության շուրջ 4 տոկոսանոց ցուցանիշը:

«Այն փաստը, որ մենք առաջին եռամսյակում ունեցել ենք դրական տնտեսական ակտիվություն, առավելապես առաջին երկու ամիսներին բնականոն ու բարձր տնտեսական ակտիվության արդյունքն է: Սա իր հերթին շարունակությունն էր 2019 թվականի նորից շատ բարձր տնտեսական ակտիվության», - ասաց նախարարը՝ նշելով, որ երկրորդ եռամսյակի սկզբից սպասվում է տնտեսական ակտիվության անկում: «Հույս ունենք, որ երրորդ եռամսյակից վերականգնումը կսկսի», - ասաց նա՝ հավելելով, որ նոր պայմաններում մեծ ջանքեր պետք է գործադրել, որպեսզի կազմակերպությունները կարողանան վերականգնել աշխատանքի բնականոն տեմպը:

Նախարարը նշեց, որ գործարար ակտիվության մասով դեռևս անցյալին վերադարձի մասին դժվար է խոսել: «Ինչու, որովհետև դժվար է սպասել անցյալի կրկնությունը: Այն պետք է լինի նոր իրավիճակին հարմարեցված և նոր մարտահրավերներին դիմակայող վարքագիծ: Կլինեն դժվարություններ, յուրաքանչյուր դեպքում մենք կփորձենք հասկանալ խնդիրները, որեպսզի կազմակերպություններն ունենան կառավարության աջակցությունը դրանց հաղթահարելու ճանապարհին», - ասաց նախարարը:

VERELQ-ը հիշեցնում է, որ համաջայն պաշտոնական տվյալների, տնտեսական ակտիվության ցուցանիշի վրա մարտին արդեն զգալի են եղել կորոնավիրուսի ազդեցությունները, որի արդյունքում հունվար-փետրվարին արձանագրված 8.7% հավելաճի փոխարեն ՏԱՑ-ի աճը հունվար-մարտին կազմել է 4%։ Համաձայն նույն տվյալների, այս տարվա առաջին եռամսյակում 8.7 տոկոսով աճել է գրանցել արդյունաբերությունը, 4.5 տոկոսով՝ գյուղատնտեսությունը, իսկ ծառայությունները՝ 5,5 տոկոսով: Միջին անվանական աշխատավարձն աճել է 9.2 տոկոսով, իսկ իրական աշխատավարձ՝ 9.3 տոկոսով: