Վահագն Վերմիշյանին առնչվող քրգործի շրջանակներում մեղադրանք է առաջադրվել ևս 6 անձի

ՀՀ քաղաքաշինության կոմիտեի նախագահ Վահագն Վերմիշյանին առնչվող քրեական գործի շրջանակներում մեղադրանք է առաջադրվել ևս 6 անձի։ Այս մասին հայտնում են ԱԱԾ-ից։

Նրանցից 3-ի նկատմամբ որպես խափանման միջոց է ընտրվել կալանավորումը՝ 2 ամիս ժամկետով։

Քրեական գործով մեղադրանք է առաջադրվել նաեւ ՀՀ քննչական կոմիտեի Երևանի քննչական վարչության նախկին պետ Ջոն Ֆարխոյանին, սակայն, ինչպես հայտնեցին ԱԱԾ-ից դատարանը նրա նկատմամբ գրավ է կիրառել։ Մեր տեղեկություններով սույն գործով մեղադրյալի կարգավիճակում է նաև հայտնի շինարար Վազգեն Պողոսյանը, որը եւս կալանավորվել է։

VERELQ-ը հիշեցնում է, որ ՀՀ քաղաքաշինության կոմիտեի նախագահ Վահագն Վերմիշյանը փետրվարի 5-ին ձերբակալվել էր առանձնապես խոշոր չափի կաշառք ստանալու կասկածանքով։

Համաձայն ԱԱԾ տարածած հաղորդագրության, վերջինս հանդիսանալով պաշտոնատար անձ, պաշտոնեական դիրքը ծառայության շահերին հակառակ օգտագործելով և անձնական շահագրգռվածությունից ելնելով, շինարակական աշխատանքներ ծավալող անձանց կամ կառուցապատող ընկերությունների ներկայացուցիչների հետ ձեռք բերված պայմանավորվածությունների համաձայն, ինչպես անձամբ, այնպես էլ մտերիմի միջոցով 5 դեպքով խոշոր և առանձնապես խոշոր՝ 1.000.000-2.500.000 ՀՀ դրամի չափով, գումարի կամ ապրանքանյութական արժեքների տեսքով կաշառք ստանալու դիմաց, 2019թ. ընթացքում նրանց օգտին կատարել է գործողություններ կամ նպաստել է ցանկալի որոշումների արագ կայացմանը և տրամադրմանը: