Միխայիլ Մյասնիկովիչն առաջին աշխատանքային այցը կկատարի Երևան

Եվրասիական տնտեսական հանձնաժողովի կոլեգիայի նոր նախագահ Միխայիլ Մյասնիկովիչն առաջին աշխատանքային այցը կկատարի Երևան: Նա Հայաստան կժամանի արդեն վաղը՝ փետրվարի 7-ին:  

ԵՏՀ մամուլի ծառայությունը հայտնում է, որ այցի շրջանակում նախատեսված են երկկողմ հանդիպումներ ՀՀ վարչապետ Նիկոլ Փաշինյանի, ՀՀ փոխվարչապետ Մհեր Գրիգորյանի, ՀՀ նախագահ Արմեն Սարգսյանի, Ազգային ժողովի նախագահ Արարատ Միրզոյանի հետ:

Հանդիպումների ընթացքում նախատեսվում է քննարկել մինչև 2025 թվականը նախատեսված Եվրասիական տնտեսական ինտեգրման զարգացման ռազմավարական ուղղությունները, ԵԱՏՄ շուկայում առկա խոչընդոտների, բացառումների և սահմանափակումների վերացման մոտեցումները: