Եթե Մանվել Գրիգորյանը դուրս գրվի, մենք մեր ասելիքը ակցիաներով կասենք. ակտիվիստ

ԱԺ նախկին պատգամավոր, գեներալ Մանվել Գրիգորյանի դեմ բողոքի ակցիաներից հայտնի ակտիվիստ Ջիվան Աբրահամյանը քիչ առաջ Facebook-ի իր էջում հայտնել է, որ փոքր խմբով շարժվում են դեպի «Նաիրի» ԲԿ, որտեղ այս պահին գտնվում է ԱԺ նախկին պատգամավորը:

Նա տեղեկացրեց, որ հեռախոսազրույց է ունեցել ԲԿ-ի ներկայացուցչի հետ, որտեղից հայտնել են, որ Գրիգորյանը գտնվում է վերակենդանացման բաժանմունքում, նրա առողջական վիճակը կայուն ծանր է, բայց բժիշկները այս պահին չեն պատրաստվում նրան դուրս գրել հիվանդանոցից:

«Խնդիրը հետևյալն է. Մանվել Գրիգորյանը կարող է հրաժարվել բժշկական ծառայություններից և գնալ տուն: Բայց քանի դեռ նա գտնվում է հիվանդանոցում, մենք ոչ մի ակցիա չենք նախատեսում: Բայց հենց Գրիգորյանը հիվանդանոցից դուրս գրվի ու գնա տուն, մենք ակցիաներ կանենք, քանի որ դա պարզ ցույց կտա, որ նրա ազատումը իրենց կողմից կազմակերպված ֆարս է»,- շեշտեց Աբրահամյանը:

Նա նաև նշեց, որ իրենք ցանկանում են, որ Մանվել Գրիգորյանը առողջանա և օրենքի առաջ ամբողջ խստությամբ պատասխան տա: