Դա նույնն է, որ ասեն, թե Մարիամի համար զրահաբաճկոններ, զենք են ձեռք բերել. վարչապետ

Տեղեկությունները, թե իմ ընտանիքի համար Պետական պահպանության ծառայությունը 2019 թվականի արտադրության ավտոմեքենա է գնել, պարզապես անհեթեթություն է: Այս մասին Facebook-ի ուղիղ եթերում հայտարարեց ՀՀ վարչապետ Նիկոլ Փաշինյանը՝ անդրադառնալով վերջին օրերին ամենաքննարկվող թեմային՝ իր դստեր համար թանկարժեք ավտոմեքենա գնելուն:

Նա նշեց, որ ՀՀ վարչապետը և նրա ընտանիքի անդամները «Հատուկ պետական պաշտպանության ենթակա անձանց անվտանգության ապահովման մասին» ՀՀ օրենքի համաձայն պետական պահպանության ենթակա անձինք են և օրենքը հստակ ասում է, որ վարչապետը չի կարող հրաժարվել պետական պահպանությունից, չեն կարող դրանից հրաժարվել նաև ընտանիքի անդամները:

«Այնտեղ մեկ դրույթ կա, ըստ որի՝ ընտանիքի անդամները կարող են ժամանակավորապես հրաժարվել, սակայն, ընդհանուր առմամբ, ո’չ վարչապետը, ո’չ ընտանիքը չեն կարող հրաժարվել: Իսկ Պետական պահպանության ծառայության աշխատակիցներն իրենց ծառայությունն իրականացնում են տրանսպորտային միջոցների կիրառմամբ: Եվ դա ոչ թե որևէ մեկի քմահաճույք է, այլ օրենքի պահանջ: Ծառայության աշխատողները, ովքեր կցված են պետական պահպանության ենթակա անձին, իրենք պետք է շարժվելու տրանսպորտ ունենան»,-ասաց  Փաշինյանը:

Նրա խոսքով, այն, որ իր ընտանիքի անդամները այդ տրանսպորտային միջոցով են տեղաշարժվում ամենևին չի նշանակում, թե այդ մեքենան իր ընտանիքի անդամի համար է գնված: Դա, շեշտեց նա, պետական պահպանության ծառայության աշխատողների համար էգնված, որոնք ապահովում են վարչապետի ընտանիքի անդամի, վարչապետի անվտանգությունը: «Նույն տրամաբանությամբ այն ավտոմեքենան, որով ես եմ շրջում, իմը չէ: Այն պետական պահպանության ծառայությանն է»,- ասաց վարչապետը:

Անդրադառնալով ավտոմեքենայի մասին հրապարակված տեղեկություններին նա ասաց, որ Պետական պահպանության ծառայությունը 2019 թվականի արտադրության ավտոմեքենա ձեռք չի բերել, ավտոմեքենաներ ձեռք են բերվել 2018 թվականին: Իսկ այդ մեքենաները ձեռք են բերվել, քանի որ ավելացել է պարտադիր պետական պահպանության ենթակա անձանց թիվը:

«Ասել, թե Մարիամ Փաշինյանի համար ավտոմեքենա է ձեռք բերվել նույնն է, ինչ ասել, թե նրա համար զրահաբաճկոններ, զենք են ձեռք բերել»,- հավելեց վարչապետը: