Աճել են Հայաստանից փայլաթիթեղի, շոկոլադի, գինու արտահանման ծավալները. նախարար

Կառավարության այսօրվա նիստում ՀՀ տնտեսական զարգացման և ներդրումների նախարար Տիգրան Խաչատրյանը ներկայացրեց տնտեսական հիմնական ցուցանիշները և նշեց, որ Պետական եկամուտների կոմիտեի տվյալներով՝ ապրիլին նախորդ տարվա նույն ժամանակահատվածի համեմատ արտահանման ծավալն աճել է 14.7 տոկոսով։

««Արմենալ» ընկերության փայլաթիթեղի արտահանման ծավալներն ապրիլին նախորդ տարվա ապրիլի նկատմամբ աճել են 44 տոկոսով։ Ծխախոտի արտադրանքի արտահանման ծավալները ապրիլին նախորդ տարվա ապրիլի համեմատ աճել են 60 տոկոսով։ Ոսկերչական արտադրանքի առաջին չորս ամիսների արտահանումը կազմել է 14 մլն ԱՄՆ դոլար. նախորդ տարվա նույն ժամանակահատվածի նկատմամբ արտահանման աճը կազմել է 68 տոկոս»,-  ասել է Խաչատրյանը:

Նախարարի խոսքով՝ շոկոլադի արտադրանքի արտահանումը չորս ամսում կազմել է 5 մլն դոլար. արտահանման ծավալն աճել է 34 տոկոսով։

Գինու արտահանման ծավալների աճը ընթացիկ տարվա առաջին 4 ամսում նախորդ տարվա չորս ամիսների համեմատ կազմել է 11 տոկոս։

Առաջին եռամսյակում նախորդ տարվա նույն ժամանակահատվածի նկատմամբ՝ Կեցության և հանրային սննդի հետ կապված ծառայությունների աճը կազմել է 23.5 տոկոս: Ֆինանսական և ապահովագրական ծառայություններն աճել են 20 տոկոսով։ Կապիտալ բնույթի ապրանքների ներմուծման աճը ապրիլին կազմել է 12.7 տոկոս։