Realpolitik. վարչապետի կարգավիճակում Փաշինյանը փոխել է դիրքորոշումն ԵԱՏՄ-ի հարցում

Վարչապետ Նիկոլ Փաշինյանը կառավարական առանձնատանը հյուրընկալել է ՌԴ կառավարության ղեկավար Դմիտրի Մեդվեդևին, ով աշխատանքային այցով ժամանել է Հայաստան՝ մասնակցելու Եվրասիական միջկառավարական խորհրդի նիստին:


Հայաստանն այժմ Եվրասիական տնտեսական միությունում հանդիսանում է նախագահող պետություն:


Հայաստանի վարչապետն այս համատեքստում կարևորել է Եվրասիական տնտեսական միությունում հարաբերությունները և Հայաստանի մասնակցությունն այդ կազմակերպությունում:


«Իհարկե, ամեն ինչ կանենք, որպեսզի Եվրասիական տնտեսական միությունը և մեր անդամակցությունը ԵԱՏՄ-ում դարձնենք ավելի արդյունավետ, կազմակերպությունը դարձնենք առավել գրավիչ»,- նշել է Փաշինյանը։


Վարչապետ Նիկոլ Փաշինյանի դիրքորոշումը կտրուկ տարբերվում է ընդդիմադիր պատգամավոր Նիկոլ Փաշինյանի դիրքորոշումից, ով խիստ քննադատում էր նախկին իշխանությունների՝ Սերժ Սարգսյանի որոշումն անդամակցել ԵԱՏՄ-ին:


Նախորդ իշխանությունները, ելնելով realpolitik-ից, անդամակցել են ԵԱՏՄ-ին, որպեսզի կարողանան օգտվել ռազմավարական դաշնակից ՌԴ-ի կողմից առաջ տարվող ինտեգրացիոն գործընթացների տնտեսական դիվիդենտներից:

Կառավարության այսօրվա ղեկավարը հասկանում է, որ ՀՀ-ն իր տնտեսական, առևտրային, էներգետիկ-տրանսպորտային կապերով սերտորեն կապված է հատկապես ՌԴ-ին, որպես ԵԱՏՄ-ի լոկոմոտիվ երկիր ու այդ կապերի խզումը լրջորեն կհարվածի հայկական տնտեսությանը:


Փաշինյանի դիրքորոշման կտրուկ փոփոխությունը թե՛ ԵԱՏՄ-ի, թե՛ ՀԱՊԿ-ի ու ՌԴ-ի հետ հարաբերությունների սերտացման առումով խոսում է այն մասին, որ ՀՀ-ի ոչ մի իշխանություն չի կարող հաշվի չառնել գեոպոլիտիկ, գեոտնտեսական այն բեքգրաունդը, որը տասնամյակներով ձևավորվել է Հարավային Կովկասում ու հնարավոր չէ գալ իշխանության ու առանց մեծ կորուստների լքել որևէ ինտեգրացիոն կառույց, որին անդամակցելն իրոք տնտեսական դիվիդենտներ է բերում շրջապատման մեջ գտնվող ՀՀ-ին:


Պոպուլիստական կամ ընդդիմադիր կեցվածքից ելնելով դիրքորոշումները կտրուկ փոխվում են, երբ պետության ղեկավարի պաշտոնում քաղաքական որևէ գործիչ բախվում է իրական խնդիրներին՝ տնտեսական, աշխարհաքաղաքական: Անհրաժեշտ է շարժվել ազգային-պետական շահերով, այլ ոչ թե պոպուլիստական հայտարարություններով՝ գործող իշխանությանը հակադրվելու կամ Սերժ Սարգսյանի ու նախկին իշխանությունների ԵԱՏՄ-ին անդամացկելու որոշումը քննադատելու տեսանկյունից:


 

Տպել

Թեմայի այլ նորություններ
Загрузка...