Սիրիա հայ զինվորականների գործուղումը Երևանի ժեստը Մոսկվային

Սիրիայի ժողովրդին մարդասիրական մասնագիտական օժանդակություն ցուցաբերելու նպատակով այսօր, փետրվարի 8-ին, հումանիտար ականազերծողներից, բժիշկներից եւ նրանց անմիջական անվտանգությունն ապահովող հայ մասնագետներից բաղկացած խումբը (ընդհանուր՝ 83 անձ) ժամանել է Սիրիայի Արաբական Հանրապետություն (ք.Հալեպ):

Հայ մասնագետները Հալեպի բացառապես ռազմական գործողություններից զերծ բնակավայրերում ծավալելու են հումանիտար ականազերծման, բնակչության հակաականային իրազեկման, բժշկական ծառայությունների մատուցման մարդասիրական գործունեություն:

Սիրիայի Արաբական Հանրապետություն հայ մասնագետների տեղափոխման, ինչպես նաեւ ապահովման խնդիրներն իրականացվում են ռուսաստանյան կողմի աջակցությամբ:

Հայկական ռազմական ներկայությունը Սիրիայում շատ կարևոր հանգամանք է` տեղի հայ համայնքին աջակցելու, ինչպես նաև հայ-ռուսական հարաբերությունների ամրապնդման տեսանկյունից:

Տարիներ շարունակ ՌԴ-ն միայնակ է աջակցում Սիրիային ու նրա ժողովրդին ահաբեկչության դեմ պայքարում: Այժմ հայ զինվորականները նախկինում հայաշատ քաղաք Հալեպում իրականացնելու են կարևոր գործառույթներ, դրանով իսկ իրենց ներդրումն ունենալով բարեկամ Սիրիայի վերականգնմանն ու հալեպահայության համար ստեղծելով անվտանգության պայմաններ վերադառնալու համար:

ՀՀ-ի նոր իշխանությունների կողմից Սիրիա հայ զինվորականներին գործուղելը նաև որոշակի քաղաքական ժեստ է. հայ-ռուսական ռազմական կապերին ոչինչ չի սպառնում, ինչի ապացույցն է նաև ՌԴ-ից նորագույն Սու կործանիչների գնումը Երևանի կողմից:

ՌԴ-ի կողմից Երևանի այս ժեստը շատ դրական է ընկալվելու, քանի որ ՀՀ-ն, հանդիսանալով ՀԱՊԿ-ի անդամ ու ՌԴ-ի ռազմավարական դաշնակից, նաև Մոսկվային իր աջակցությունն է հայտնում ծանր պահին` Սիրիայում պատերազմը դեռ չի ավարտվել և այժմ այդ երկրի կարևորագույն հատվածի` Հալեպի վերականգնման աշխատանքներին մասնակցելը շատ սիմվոլիկ ժեստ է:

Կարևոր հանգամանք է, որ հայ զինվորականները չեն մասնակցում ռազմական գործողություններին, դրանով գրեթե բացառելով մարդկային կորուստներն ու ՀՀ-ն չի կագնում հակամարտող կողմերից որևէ մեկի կողքին` պահպանելով որոշակի չեզոքություն: Դրանով ՀՀ-ն արաբական աշխարհում զերծ է մնում որոշակի ճնշումներից  հակաասադական արաբական կոալիցիայի կողմից: