Քաղաքական հետապնդման մասին խոսք անգամ լինել չի կարող. ՀՔԾ պետը՝ Լավրովին

Քաղաքական հետապնդման մասին խոսք անգամ լինել չի կարող: Այս մասին լրագրողների հետ ճեպազրույցում հայտարարեց ՀՀ Հատուկ քննչական ծառայության պետ Սասուն Խաչատրյանը՝ մեկնաբանելով ՌԴ արտգործնախարար Սերգեյ Լավրովի հայտարարությունը:

Նա նշեց, որ թեև ՀՔԾ պետն այն պաշտոնյան չէ, ով պետք է մեկնաբանի այլ երկրի արտաքին գերատեսչության ղեկավարի խոսքերը, այդուհանդերձ ինքը կներկայացնի իր կարծիքը:

«Այս գործընթացը խիստ իրավական ընթացակարգերում է, և շահարկողներին, ովքեր բազմիցս ասել են, թե իբր ՀՔԾ մեղադրանքի որոշման մեջ կասկածի տակ է դրվում ընտրությունների արդյունքները, ուզում եմ պաշտոնապես տեղեկացնել, որ մեր որոշման մեջ նման դրույթ չկա: Մենք կասկածի տակ չենք դրել ընտրության արդյունքները: Մենք ընդամենը նշել ենք, որ քաղաքացիները, որոնք ընտրությունների արդյունքները համարել են կեղծված, դուրս են եկել փողոց իրենց իրավունքները վերականգնելու համար»,- շեշտեց Խաչատրյանը:

Անդրադառնալով Ռոբերտ Քոչարյանի կալանքի տակ մնալու շուրջ ստեղծված իրավիճակին նա նշեց, որ նախկին նախագահի կալանքի տակ պահելն անհրաժեշտ է լրիվ ծավալով քննություն իրականացնելու համար: