Իշխանությունը ճամպրուկ չէ, որ ինչ-որ մեկն այն փոխանցի Փաշինյանին. Ռոբերտ Քոչարյան

ՀՀ երկրորդ նախագահ Ռոբերտ Քոչարյանը НТВ հեռուստաալիքի կիրակնօրյա վերլուծական հաղորդման ռեպորտաժում մեկնաբանելով Հայաստանում ստեղծված իրավիճակը՝ ասել է.

«Ի՞նչ է պահանջում Նիկոլ Փաշինյանը՝ ինձ իշխանություն տվեք հենց հիմա, անհապաղ: Իշխանությունը ճամպրուկ չէ, որ ինչ-որ մեկն այն վերցնի ու փոխանցի Նիկոլ Փաշինյանին: Դա կոնկրետ մարդիկ են, խորհրդարանն է, պատգամավորական կորպուսն է, իրենք ունեն սեփական ինքնասիրություն և ստիպել, շանտաժ անել մարդկանց մեծ քանակով, ստիպել նրանց գնալ սեփական խղճի, հայացքների, քաղաքականության մասին ունեցած պատկերացումների դեմ, կարծում եմ, սա լիովին այլ ծայրահեղություն է»:

Ռեպորտաժում նշվում է, որ Հայաստանում մայդան չէ և քաղաքացիական անհնազանդության ողջ ընթացքում որևէ ապակի անգամ չի կոտրվել: Նշվում է, որ Սերժ Սարգսյանը հրաժարական տվեց և իշխող կուսակցությունը թեկնածու չառաջադրեց՝ նախընտրելով պահպանել երկրի կայունությունը: Ընդդիմությունը ոտքի հանեց ժողովրդին, քանի որ Սերժ Սարգսյանը, փոխելով Սահմանադրությունը, նախագահի աթոռից նստեց վարչապետի աթոռին, բայց վրիպեց, գրում է "Այսօրը":

Սպորտի նախկին նախարար Հրաչյա Ռոստոմյանը, մեկնաբանելով իրավիճակը, ասում է, որ սա գունավոր հեղափոխություն, կամ մայդան չէ և մարդիկ պարզապես իրենց դժգոհությունն են արտահայտում:

Հրանտ Թոխատյանն էլ կարևորում է հավաքների խաղաղ բնույթը:

Նիկոլ Փաշինյանն ընդգծում է, որ իրենց խաղաղ գործողություններով փորձելու են հասնել իշխանության անցնցում փոխանցմանը և նախկին իշխանությունների նկատմամբ վենդետա չեն իրականացնելու: