Թրամփը ուղերձ է հղել Ալիևին՝ անդրադառնալով նաև ԼՂ հակամարտությանը

ԱՄՆ նախագահ Դոնալդ Թրամփը ուղերձ է հղել Ադրբեջանի նախագահ Իլհամ Ալիևին, որում նշվում է ղարաբաղյան հակամարտության խաղաղ կարգավորման մասին: Այս մասին հաղորդում է Ադրբեջանի նախագահի աշխատակազմի մամուլի ծառայությունը:

«Ես ակնկալում եմ համատեղ աշխատանք ամերիկացի և ադրբեջանցի ժողովուրդների համար փոխադարձ հետաքրքրություն ներկայացնող բազմաթիվ ոլորտներում: 

Միասին մենք կարող ենք հասնել ահաբեկչության նկատմամբ հաղթանակի, նոր աշխատատեղերի ստեղծման և Եվրոպայի էներգետիկ անվտանգության բարելավման: Կոռուպցիայի դեմ պայքարում առաջընթացը և ղարաբաղյան հակամարտության խաղաղ կարգավորումը իրենց ներդրումը կունենան այդ ջանքերում», - ադրբեջանական կողմի փոխանցմամբ՝ գրել է Սպիտակ տան ղեկավարը:

Ի դեպ, չի հստակեցվում, թե ինչ առիթով է Ալիևին ուղերձ հղել Թրամփը: