Սիրիա են ժամանել ռուսաստանյան նոր սերնդի Սու-57 կործանիչները (տեսանյութ)

Փետրվարի 21-ին Սիրիայում Ռուսաստանի օդատիեզերական ուժերի «Հմեյմիմ» ավաբազա է ժամանել երկու միավոր նոր սերնդի Սու-57 կործանիչ, որոնք նաեւ հայտնի են Տ-50 գործարանային ինդեքսով:

Այս մասին հայտնում է ռուսաստանյան «Ռազմավարությունների եւ տեխնոլոգիաների վերլուծության կենտրոնի» (bmpd) բլոգը:

Նշենք, որ սիրիական աղբյուրների տեղեկությունների համաձայն՝ ավիաբազա են ուղարկվել նաեւ 4 միավոր Սու-35Ս կործանիչ, Սու-25 գրոհիչներ եւ հեռավոր ռադիոտեղորոշիչ հայտնաբերման Ա-50Ու ինքնաթիռ, գրում է Ռազմինֆոն:

Սու-57-ը ռուսաստանյան արտադրության նոր սերնդի կործանիչ է: Կործանիչի առաջին թռիչքը իրականացվել է 2010 թվականին: 2010-2017 թթ. ընթացքում արտադրվել է 10 միավոր Սու-57 (Տ-50) կործանիչ, այդ թվում՝ 3 միավորը ստեղծվել է 2017 թվականին:

Ըստ վերջին տվյալների՝ Սու-57-երի մատակարարումը Ռուսաստանի զինուժին նախատեսվում է սկսել 2018-ին: Ռուսաստանի պաշտպանության նախարարությունը դեռեւս չի մեկնաբանել Սու-57 կործանիչների ժամանումը Սիրիա: