Ադրբեջանում արտահերթ ընտրությունների անցկացման միջոցով սինխրոնացվում է Ադրբեջանի ու Հայաստանի կառավարող վերնախավերի համար նախատեսվող իշխանությունը պահելու հերթական շրջափուլի մեկնարկը: Այս մասին VERELQ-ի հետ զրույցում ասաց ԼՂՀ նախկին արտգործնախարար Արման Մելիքյանը:
«Հավանաբար սա նաև անուղղակի նշանն է այն բանի, որ Բաքվում վստահ են, որ ապրիլին ՀՀ վարչապետի պաշտոնը կստանձնի Սերժ Սարգսյանը և կրկին իր ձեռքում կկենտրոնացնի երկրի գործադիր իշխանությունը: Եթե պարոն Ալիևը չտեղափոխեր նախագահական ընտրությունները, ապա ապրիլից հոկտեմբեր ընկած ժամանակահատվածում հակամարտության կարգավորման գործընթացի համատեքստում հանդես էր գալու թույլի դիրքերից, քանի որ խոցելի կլիներ ընտրություններին նախորդող ներքաղաքական հարաբերական անորոշության պայմաններում»,- ասաց նա:
Մելիքյանը չի բացառում նաև, որ դրա հետ մեկտեղ բանակցային գործընթացում զարգացումներ են տեղի ունենում, որոնք ինչ-որ փոփոխությունների են հանգեցնելու դեռ մինչև հոկտեմբեր ամիսը և Ալիևն ընտրությունները ապրիլին անցկացնելու որոշումը կայացրել է նաև այդ զարգացումների հնարավոր բացասական հետևանքներից առաջ ընկնելու և իր իշխանական ապագան կանխավ լիովին ապահովագրելու համար:
«Սրանք, թերևս, որոշման հայկական գործոնի հետ կապված հնարավոր դրդապատճառներն են, բայց չեմ բացառում, որ Իլհամ Ալիևը կարող է նման որոշում կայացնելու համար նաև այլ կարևոր պատճառներ ունենալ»,- հավելեց մեր զրուցակիցը:
Հիշեցնենք, Ադրբեջանի նախագահ Իլհամ Ալիևը հրամանագիր է ստորագրել՝ երկրում արտահերթ նախագահական ընտրություններ անցկացնելու կապակցությամբ: Ընտրությունները կկայանան 2018 թվականի ապրիլի 11-ին:
Նշենք, որ այս որոշումը իրարանցում է առաջացրել ադրբեջանական ընդդիմության շարքերում: Ժողովրդավարական ուժերի ազգային խորհրդի ղեկավար Ջամիլ Հասանլին հայտարարել է, որ Ադրբեջանում արտահերթ ընտրությունների անցկացումն իշխանությունը պահպանելու փորձ է։ Ըստ նրա, դրա կարիքը չկա Ադրբեջանում, իսկ պատճառն էլ այն է, որ երկրում սոցիալ–տնտեսական իրավիճակը վատթարացումն ազդում է իշխանությունների վարկանիշի անկման վրա:
Իր հերթին, Մուսավաթի նախկին առաջնորդ Իսա Ղամբարը հայտարարել է, որ իշխանությունները հասկանում են, որ եթե ընտրություններն անցկացնեն հոկտեմբեին, այդ ժամանակ բնակչության դժգոհությունը սոցիալական և քաղաքական վիճակից կլինի ավելի մեծ, քան հիմա. «Ալիևը շտապում է կեղծել ընտրություններն ու երկարաձգել սեփական իշխանությունը»,- ասել է նա։
