Թուրքիայում պահանջում են Կարո Փայլանին զրկել պատգամավորական անձեռնմխելիությունից

Թուրքիայի դատախազությունը 121 պատգամավորի անձեռնմխելիությունը դադարեցնելու պահանջագրեր է ներկայացրել մեջլիսի ղեկավարությանը, որպեսզի նրանց դեմ իրավական գործընթաց սկսվի: Պատգամավորների թվում է նաև Կարո Փայլանը: Այս մասին գրում է Demokrathaber.org-ը:

Բացի այդ, առաջարկվում է անձեռնմխելիությունից զրկել նաև Ժողովրդահանրապետական կուսակցության առաջնորդ  Քեմալ Քըլըքչադրօղլուին: Խոսքն այն կուսակցության առաջնորդի մասին է, որը մի քանի ամիս առաջ կողմ էր քվեարկել օրենքին, որով հենց թույլատրվում է պատգամավորներին զրկել անձեռնմխելիությունից:

Նշվում է, որ ներկայացված պահանջագրերից 46-ը վերաբերվում է քեմալական կուսակցության պատգամավորներին, 75-ը՝ քրդամետ Ժողովուրդների դեմոկրատական կուսակցությանը: 3 պահանջագիր է ուղարկվել ԺԴԿ-ի համանախագահ Սելահաթթին Դեմիրթաշի վերաբերյալ, որն արդեն այլ քրեական գործերի շրջանակներում զրկված է անձեռնմխելիությունից ու կալանավորվորված: