ՄԱԿ գլխավոր քարտուղարը «ոգևորված է» Սարգսյան-Ալիև հանդիպումից

ՄԱԿ-ի գլխավոր քարտուղար Անտոնիո Գուտերեշը ողջունել է Լեռնային Ղարաբաղի հակամարտության վերաբերյալ Ադրբեջանի եւ Հայաստանի հանդիպումը և ոգևորված է նախագահների համաձայնությունից՝ քայլեր ձեռնարկել լարվածությունը նվազեցնելու համար: Այս մասին հայտարարել է ՄԱԿ-ի գլխավոր քարտուղարի պաշտոնական ներկայացուցիչ Ստեֆան Դյուժարիկը:

Անտոնիո Գուտերեշը կոչ է արել Սերժ Սարգսյանին և Իլհամ Ալիևին հասնել իրավիճակի խաղաղ կարգավորմանը:

«Նա ոգևորված է, որ նախագահները համաձայնել են միջոցներ ձեռնարկել բանակցային գործընթացը խորացնելու եւ շփման գծում լարվածության նվազեցման լրացուցիչ քայլեր ձեռնարկելու համար:ՄԱԿ-ը աջակցում է ԵԱՀԿ Մինսկի խմբի համանախագահների միջնորդական ջանքերին», - ասել է Դյուժարիկը:

Գուտերեշը նաև կոչ է արել կողմերին բանակցությունների ընթացքում հասնել ղարաբաղյան հակամարտության խաղաղ կարգավորման:

Հիշեցնենք, Հայաստանի եւ Ադրբեջանի նախագահները նախօրեին Շվեյցարիայում բանակցություններ են անցկացրել ԵԱՀԿ Մինսկի խմբի համանախագահների նախաձեռնությամբ` քննարկելով Լեռնային Ղարաբաղի հակամարտության կարգավորման հարցը: Կողմերը համաձայնել են միջոցներ ձեռնարկել հետագա լարվածությունը նվազեցնելու համար, որպեսզի ճակատային գծում զոհեր չլինեն: