Նախարար Նալբանդյանը ՄՃԽ նախագահին ներկայացրել է քառօրյա պատերազմում Ադրբեջանի խախտումները

Սեպտեմբերի 22-ին Նյու Յորքում արտգործնախարար Էդվարդ Նալբանդյանը հանդիպել է Միջազգային ճգնաժամային խմբի նախագահ Ժան-Մարի Գեհենոյին. այս մասին տեղեկացնում է ԱԳՆ մամուլի ծառայությունը:

ՄՃԽ ղեկավարը Հայաստանի արտգործնախարարին ներկայացրել է կազմակերպության գործունեության ուղղություններն ու կատարվող հետազոտությունները։

Էդվարդ Նալբանդյանը, կարևորելով Միջազգային ճգնաժամային խմբի գործունեությունը, շեշտեց, որ կազմակերպության կողմից պատրաստվող զեկույցները պետք է հիմնված լինեն վստահելի աղբյուրների, անաչառ վերլուծությունների վրա, հաշվի առնեն հակամարտության բոլոր կողմերի կարծիքները, իրենց նպաստը բերեն համաձայնեցված ձևաչափերում իրականացվող բանակցային գործընթացներին՝ ուղղված հակամարտությունների բացառապես խաղաղ կարգավորմանը։

ՄՃԽ նախագահի խնդրանքով նախարար Նալբանդյանը հանգամանալից ներկայացրեց Լեռնային Ղարաբաղի հիմնախնդրի հանգուցալուծման նպատակով Հայաստանի և ԵԱՀԿ Մինսկի խմբի եռանախագահող երկրների կողմից ձեռնարկվող ջանքերը, ինչպես նաև 2016թ. ապրիլին Արցախի դեմ Ադրբեջանի կողմից իրականացված լայնածավալ ռազմական ագրեսիայի ընթացքում տեղ գտած միջազգային մարդասիրական իրավունքի կոպտագույն խախտումները: