«Հայկական բանջարեղենը, միրգը, կոնյակը, հարց եմ տալիս՝ որտե՞ղ են մրցունակ: Եվրոպական շուկայո՞ւմ: Դե թող գնան մի հատ Հունաստանում հայկական ձուկ վաճառեն»:
Այս մասին հայտարարել է ՀՀ ԱԺ փոխխոսնակ, իշխող հանրապետական կուսակցության մամուլի քարտուղար Էդուարդ Շարմազանովը՝ մեկնաբանելով այն հայտարարությունները, որ Հայստանը, հրաժարվելով Ասոցիաիցիայի համաձայանգրից, կորցրել է եվրոպական 600 միլիոնանոց շատ ավելի վճարունակ շուկա անարգել մուտք գործելու հնարավորությունը:
«Նման բաները ցանկություններով չեն, այլ իրավապայմանագրային բազայով: Թող կարդան մի հատ Ռիգայի հռչակագիրը և տեսնեն՝ ԵՄ-ն ընդլայնվելու ցանկություն ունի՞, թե չէ: Ու ի՞նչ, իսպանական արտադրանքի կողքին սպասում էին, որ Հայաստանի կոնյա՞կը վաճառեն: Եվ մեր ապրանքներն օբյեկտիվորեն ավելի մրցունակ են եվրասիական շուկայում: Ցանկություններ… եկեք միանանք Չինաստանին, այնտեղ էլ 1.5 միլիարդանոց շուկա կա, հո ասելով չէ», - ասել է Շարմազանովը tert.am-ի հետ զրույցում:
Նրա խոսքով, եթե Հայաստանը գործընթաց է սկսում ԵԱՏՄ-ից դուրս գալու, ապա բախվելու է հետևյալ խնդիրներին. գազի գինը կտրուկ բարձրանալու է, հայկական ապրանքների մաքսատուրքը կտրուկ բարձրանալու է, աշխատողները, որ այնտեղ ազատ պայմաններում աշխատում են, նրանց իրավունքները սահմանափակվելու են:
Անդրադառնալով ՀՀ Վարչապետ Կարեն Կարապետյանի՝ ռուսաստանցի գործարարներին ուղղված հայտարարությունը, որ ՀՀ շուկան ռուսական կողմի համար թերագնահատված է, Շարմազանովը նշել է, որ «եթե մեր ապրանքները թերագնահատած են այս շուկայում կամ գովազդված չեն, ուրեմն մեր կառույցները պետք է լավ աշխատեն՝ ռուսական կողմի հետ»:
«Եվ այնպես չէ, որ ամեն տեղ հայկական ապրանքներին ասում են՝ էստի համեցեք: Եվ ԵԱՏՄ հնարավորություններից պետք է օգտվել. հնարավորություն ունենալը դեռ չի նշանակում բացարձակ հնարավորություն, աշխարհը մրցակցություն է: Դրա համար պիտի ավելի ակտիվ աշխատենք, պրոակտիվ քաղաքականություն վարենք, մեր Էկոնոմիկայի նախարարությունը, Գործարարների միությունը, մենք՝ խորհրդարանականներս», - ասել է նա:
Մյուս կողմից նա հարցադրում է հնչեցնում՝ արդյո՞ք այստեղից բխում է, որ ՀՀ-ն պետք է դուրս գա ԵԱՏՄ-ից: «Անիմաստն այն խոսակցություններն են, որ Հայաստանը պետք է ԵԱՏՄ-ից դուրս գա: Դա ոչ միայն անիմաստ է, դա նաև վտանգավոր է Հայաստանի համար: Որ ասում են՝ ԵԱՏՄ-ից դուրս գանք, դուրս գանք, ո՞ւր մտնեք: Մեզ համար փակում ենք 180 միլիոնանոց շուկան ու որ դուրս ենք գալիս, գազը մեզ ո՞վ է տալու՝ 155 դոլարով ենք գնում: Կրկնում եմ՝ Եվրասիական տնտեսական միություն մուտքը լուրջ հնարավորություն է, իսկ հակառակը հղի է Հայաստանի տնտեսության համար շատ լուրջ վտանգներով: Եվ տեղը ի՞նչ են առաջարկում», - ասել է նա:
«Դրա փոխարեն՝ ինչ են առաջարկելու: Հայկական բանջարեղենը, միրգը, կոնյակը, հարց եմ տալիս՝ որտե՞ղ են մրցունակ: Եվրոպական շուկայո՞ւմ: Դե թող գնան մի հատ Հունաստանում հայկական ձուկ վաճառեն», - հարցադրում է հնչեցրել նա:
