Արցախի անկախության ճանաչման գործընթացը փուլերի բաժանել չի կարելի. Կարեն Միրզոյան

Արցախի անկախության ճանաչման գործընթացը փուլերի բաժանել չի կարելի: Այս մասին «Արցախպրեսի» հետ զրույցում նշել է Արցախի Հանրապետության արտաքին գործերի նախարար Կարեն Միրզոյանը:

«Արցախի անկախությունը յուրաքանչյուր հայի համար մի խորհուրդ է, որը մեզ դրդում է նայել դեպի ապագան և այն անելիքները, որ մենք ունենք իրագործելու, որպեսզի հասնենք մեր համազգային իղձերի իրականացմանը»,-ասել է նա:

«Ես կարծում եմ, որ Արցախի անկախության ճանաչման գործընթացը փուլերի բաժանել չի կարելի: Դա պրոցես է, որ մենք շարունակելու ենք երկար տարիներ և այդ ուղղությամբ ակտիվ աշխատանք ենք ծավալում: Արցախի ճանաչումը ոչ միայն արցախցիների, այլ նաև համայն հայության միահամուռ ջանքերով է արվում»,-իր խոսքն է ամփոփել Կարեն Միրզոյանը:

1991 թվականի սեպտեմբերի 2-ին Լեռնային Ղարաբաղի Հանրապետությունը հռչակեց անկախություն:

«Հռչակագիր Լեռնային Ղարաբաղի Հանրապետության հռչակման մասին» հռչակագիրն ընդունվեց Ստեփանակերտում տեղի ունեցած պատգամավորների մարզային և Շահումյանի շրջանային խորհրդի համատեղ նստաշրջանում. այն ԼՂՀ հռչակման և նրա պետական իշխանության ու կառավարման ժամանակավոր մարմինների ձևավորման մասին փաստաթուղթ է։

Նույն թվականի դեկտեմբերի 10-ին տեղի ունեցավ հանրաքվե, որը հաստատեց Լեռնային Ղարաբաղի անկախությունը։ Այդ օրը ԼՂՀ բնակչության 80%-ը մասնակցեց հանրաքվեին, որոնց 99%-ից ավելին քվեարկեց անկախության օգտին։