Եթե Արևմուտքն ընդուներ ՌԴ առաջարկները՝ ԼՂ հակամարտությունը վաղուց կարգավորված կլիներ. ԱԳՆ

Եթե Արևմուտքն ընդուներ Ռուսաստանի առաջարկները, Լեռնային Ղարաբաղի հակամարտությունը վաղուց կարգավորված կլիներ: Այդ մասին հայտարարել է ՌԴ արտգործնախարար Սերգեյ Լավրովը՝ հանդես գալով Մոսկվայի միջազգային հարաբերությունների պետական ինստիտուտի ուսանողների և դասախոսների առաջ: Այս մասին հաղորդում է ՏԱՍՍ-ը:

Նա նշել է, որ Ռուսաստանը միակ երկիրն է, որ հավատարիմ է այն հռչակագրերին, որոնք վերջին 20 տարիների ընթացքում ընդունվել են ԵԱՀԿ-ում և Ռուսաստան-ՆԱՏՕ խորհրդում: Այդ հռչակագրերում, ըստ Լավրովի, ամրագրված է եվրատլանտյան շրջանում և Եվրասիայում հավասար անվտանգության տարածք ձևավորելու կողմերի ցանկությունը, ինչպես նաև վստահեցումը, որ երկրների ոչ մեկը չի  ուժեղացնի իր անվտանգությունն ուրիշների անվտանգության հաշվին: Լավրովը վստահություն է հայտնել, որ  եթե այդպես լիներ, շատ հակամարտություններ, որոնք այսօր պահպանվում են Եվրոպայում, այդ թվում և ղարաբաղյան և մերձդնեսթրյան հակամարտությունները վաղուց կարգավորված կլինեին: 

«Ես ափսոսում եմ, որ այդ  հռչակագրերն այդպես էլ թղթի վրա են մնացել: Դրանք իրավաբանորեն պարտավորեցնող դարձնելու մեր բոլոր փորձերը մերժվել են մեր արևմտյան գործընկերների կողմից: Ես վստահ եմ, որ եթե հավասար անբաժանելի անվտանգությունն իսկապես ստանար իրավաբանորեն պարտավորեցնող ձև, շատ հակամարտություններ, որոնք այժմ կան Եվրոպայում, վաղուց կարգավորված կլինեին»,- հավելել  է նա: