Ռուս զինծառայողը Սևանում ջրահեղձ չի եղել. հայտնի են նրա մահվան հանգամանքները

Օգոստոսի 13-ին Սևանա լճում ռուս զինծառայողը մահացել է ոչ թե ջրահեղձման հետևանքով, նրա մահվան պատճառ է հանդիսացել ներքին արյունահոսությունը:Այս մասին հայտնում են Քննչական կոմիտեից:

Ինչպես VERELQ-ը տեղեկացրել էր, 2017 թվականի օգոստոսի 13-ին «Սևան ԲԿ»-ից ահազանգ է ստացվել, որ իրենց մոտ է տեղափոխվել 1997թ. ծնված երիտասարդի դի։ Քննությամբ պարզվել է, որ տուժողը Հայաստանի Հանրապետությունում տեղակայված ռուսական N զորամասի պայմանագրային զինծառայող է, ազգությամբ ռուս, ով 3 զինակից ընկերների հետ դեպքի օրը գտնվել է Գեղարքունիքի մարզում։ Նշված օրը ժամը 18.00-ի սահմաններում լճում լողալիս զինծառայողին հայտնաբերել էին մահացած և որպես նախնական վարկած էր շրջանառվում, որ նա մահացել է ջրահեղձման հետևանքով:

Սակայն դիահերձման արդյունքներով՝ դատաբժիշկների տրամադրած տվյալների համաձայն, զինծառայողի մահվան պատճառ է հանդիսացել ներքին արյունահոսությունը:

ՔԿ նախագահ հանձնարարությամբ՝ զինծառայողի մահվան դեպքի առթիվ նախապատրաստված նյութերը փոխանցվել են ՌԴ քննչական կոմիտեի զինվորական քննչական բաժին։