Աֆղանստանում հարձակման հետևանքով զոհվել է վրաստանցի խաղաղապահ, ևս երեքը՝ վիրավորվել

Օգոստոսի 3-ին Աֆղանստանի Բագրամ ավիաբազայի մոտակայքում հարձակվել են ՆԱՏՕ-ի «Վճռական աջակցություն» առաքելության զինծառայողների պարեկախմբի վրա. զոհվել է Վրաստանի ԶՈւ 1 զինծառայող, ևս 3-ը տարբեր աստիճանի վնասվածքներ են ստացել: Այս մասին հայտնում է Վրաստանի ՊՆ կայքը:

Ըստ Վրաստանի ՊՆ հաղորդագրության՝ 2 ահաբեկիչ մոտեցել և պայթեցրել են իրենց այն վայրում, որտեղ ամերիկացի և աֆղանստանցի զինծառայողների հետ միասին պարեկություն էին իրականացնում Վրաստանի ԶՈւ զինծառայողները:

Զոհված զինծառայողը Վրաստանի ԶՈւ 2-րդ հետևակային բրիգադի 23-րդ հետևակային գումարտակի կրտսեր սերժանտ Մդինարի Բիբիաշվիլին է՝ ծնված 1991-ին: Կրտսեր սերժանտը մինչ այդ 2 անգամ մասնակցել էր Աֆղանստանում խաղաղապահական առաքելություններին՝ 2012 և 2014 թվականներին:

Վիրավորված զինծառայողներից կապիտան Ամիրան Գվիրձիշվիլիի վիճակը գնահատվում է կայուն ծանր: Մյուս երկու վիրավորները՝ ավագ լեյտենանտ Գիգա Խեխութաշվիլին և կապրալ Գեգա Խարշիլաձեն, գտնվում են բավարար վիճակում:

Ռուսաստանյան «ՌԻԱ Նովոստի» գործակալության տվյալներով՝ հարձակման հետևանքով զոհվել է ՆԱՏՕ-ի առաքելության 1 զինծառայող, ևս 5-ը վիրավորվել է: Աղբյուրը չի հայտնում, թե որ երկրի զինծառայողներ են: Ըստ գործակալության՝ հարձակումը գործել են «Թալիբան» ահաբեկչական խմբավորման զինյալները:

Նշենք, որ Վրաստանը մասնակցում է Աֆղանստանում խաղաղապահ գործողություններին 2009 թ-ի նոյեմբերից: Այնուհետև Երկիրը միացավ ՆԱՏՕ-ի «Վճռական աջակցություն» առաքելությանը 2015-ի հունվարից և Միացյալ Նահանգներից հետո Աֆղանստանում ունի 2-րդ ամենամեծ զորախումբը: Վերջին 7,5 տարիների ընթացքում Աֆղանստանում զոհվել են 30 և վիրավորվել 120 վրաստանցի զիծառայողներ: