Բաքվում անազատության մեջ պահվող լրագրող Մուխթարլին լուրջ հիվանդ է

Բաքվում անազատության մեջ պահվող ընդդիմադիր լրագրող Աֆղան Մուխթարլին լուրջ հիվանդ է: Այս մասին Facebook-յան իր էջում գրառել է լրագրողի փաստաբան Էլչին Սադիգովը:  

Сontact.az-ի հաղորդմամբ, լրագրողը նրան հայտնել է, որ իրեն թույլ չեն տալիս տաքացնել սնունդը, որը նրան են բերում հարազատները, իսկ տեղում տրվող սնունդը որակյալ չէ: Այդ պատճառով նա ունի սուր ստամոքսային ցավեր, չի կարողանում նորմալ սնվել և նիհարել է 16 կգ: 

Աղբյուրը հիշեցնում է, որ Մուխթարլիին առևանգել էին Թբիլիսիում, ապօրինի տեղափոխել Բաքու, որտեղ ձերբակալել են ապօրինի սահմանը հատելու, իշխանությունների  բռնի դիմադրություն ցույց տալու, ինչպես նաև մաքսանենգության համար: Լրագրողը կալանավորվել է 3 ամիս ժամկետով: