ԼՂ հակամարտությունը պետք է կարգավորվի բանակցություններով, ոչ թե սպանություններով. ԵԱՀԿ

Ղարաբաղյան հակամարտությունը պետք է կարգավորվի բանակցությունների հիմքով, այլ ոչ թե երիտասարդ հայերի ու ադրբեջանցիների սպանություններով։ Այս մասին հայտնել են ԵԱՀԿ-ում Ավստրիայի նախագահությունում՝ մեկնաբանելով Ադրբեջանի կողմից հրադադարի վերջին խախտումները, որոնց հետեւանքով 4 հայ զինծառայող է զոհվել։

«ԵԱՀԿ ՄԽ համանախագահների հետ միասին մենք բազմիցս հայտնել ենք, որ հրադադարի խախտումներն անընդունելի են, դրանք խոչընդոտում են խաղաղ գործընթացին»,- հայտնել է նախագահության մամուլի քարտուղար Հելեն Շպիտցերը, պատասխանելով այն հարցին, արդյոք ավստրիական նախագահությունը մտադիր է հայտարարությամբ հանդես գալ կամ էլ որեւէ քայլ անել հետագա էսկալացիան կանխելու համար, գրում է NEWS.am–ը։

Նրա խոսքով, անհրաժեշտ է մեղմել հռետորաբանությունը ու պահպանել հումանիտար իրավունքը։ «Մենք ամբողջովին աջակցում ենք համանախագահների մշտական միջնորդական ջանքերը ու վկայակոչում նրանց վերջին հայտարարությունը, որը հրապարակվել է հունիսի 19-ին։ Կարգավորման գործընթացն առաջ մղելու մասին նրանց մտահղացումները ամոբողջովին համապատասխանում են մեր մոտեցմանը, որպես ԵԱՀԿ-ի նախագահության»,- նշվում է հայտարարության մեջ։

Հիշեցնենք, համանախագահները վերջերս այցելեցին Հայաստան, Արցախ և Ադրբեջան: Հայաստանի ղեկավարության հետ հանդիպումներում բարձրաձայնվեց մտահոգություն առաջնագծում արձանագրվող միջադեպերի առնչությամբ: Սակայն համանախագահների այցից հետո Բաքուն դիմեց հերթական գործողություններին, որոնք սրեցին իրավիճակը սահմանին, ինչի հետևանքով անցած շաբաթ առաջնագծում զոհվել է չորս հայ զինծառայող: