Բաքվի կախվածության գինը. Ջավախքում ամեն ամիս սպասում են գազի գնի թանկացմանը

Ախալքալաքում, ինչպես նաև ողջ Վրաստանում, կթանկանա արդյո՞ք բնական գազը, թե՞ ոչ, դեռ անորոշ է. պարզ կլինի այս տարվա հուլիսին, երբ Ազգային կարգավորող հանձնաժողովը որոշում կկայացնի գազի վերջնական սակագնի հետ կապված,- գրում է jnews.ge-ն:

Ախալքալաքում ամեն ամիս սպասում են, որ գազի կտրոնները կգան նոր բարձրացված սակագնով: Էներգետիկայի նախարար Կախա Կալաձեն գազի սակագնի բարձրացումը չի բացառում: «Ինչ վերաբերում է սպասելիքներին՝ չի բացառվում, որ բնական գազի սակագնի գինը կբարձրանա»,- ասել է նախարարը:

Վրաստանի ջրամատակարարման և էներգետիկայի Ազգային կարգավորող հանձնաժողովը 2017թ.-ի մարտին սկսել է գազի սակագների վերանայումը: «Մենք չունենք կոնկրետ ապացույցներ, նման խոսակցություններ լսել եմ: Ավելի կոնկրետ մենք կիմանանք հուլիսի մեկից: Մինչ հուլիս կլինի հին գինը, սակայն հուլիսին սպասվում է թանկացում»,- Jnews-ին տված հարցազրույցում ասել է SJGC գազաբաշխիչ ընկերության տնօրեն Ռազմիկ Ղումաշյանը:

2005թ.-ից, գազի գները Վրաստանում չեն վերանայվել, իսկ էլեկտրաէներգիայի սակագները բարձրացել են 2015թ.-ի սեպտեմբերին: Ինչպես հայտնում է SJGC գազաբաշխիչ ընկերությունը, ներկա պահին սակագների հետ կապված ընթանում են բանակցություններ Վրաստանի և Ադրբեջանի «Սոքար» նավթային ընկերության միջև:

Այժմ բնական գազի սակագինը Թբիլիսիում կազմում է մոտ 0.46 լարի, իսկ տարածաշրջաններում 0.40-ից 0.50 լարի` 1 խորանարդ\մ-ի համար: Բարձրլեռնային Ախալքալաքում, որտեղ մինչ օրս, ոմանք ստիպված են ջեռուցում միացնել, մեկ խորանարդ\մ բնական գազի գինը ամենաբարձրերից մեկն է` 0.482 թերթի:

Հիշեցնենք, որ Վրաստանը գերթե ամբողջությամբ գազը ներկրում է Ադրբեջանից, և ինչպես մի քանի անգամ նշել է Էներգետիկայի նախարար Կախա Կալաձեն, Թբիլիսին ամբողջությա,բ կախված է ադրբեջանական գազից: