Միջազգային հեղինակավոր Moody’s վարկանիշային գործակալությունը Հայաստանի սուվերեն վարկանիշի հեռանկարը «կայունից» փոխել է «դրականի»: Կառավարությունն ու Կենտրոնական բանկը այս վերանայումը կապում են աշխարհաքաղաքական ռիսկերի մեղմացման և միջազգային շուկայում երկրի հանդեպ վստահության աննախադեպ աճի հետ:
Հուլիսի 30-ին կայացած Կառավարության նիստում վարչապետ Նիկոլ Փաշինյանը կարևորեց գործակալության որոշումը՝ նշելով, որ թեև երկարաժամկետ վարկանիշը պահպանվել է Ba3 մակարդակում, հեռանկարի բարելավումն ունի խորքային և հիմնարար պատճառներ։ Վերլուծաբանները դրական տեղաշարժը հիմնավորում են քաղաքական ու աշխարհաքաղաքական ռիսկերի էական նվազմամբ։
Մասնավորապես, փաստաթղթում ընդգծվել են Ադրբեջանի հետ լայնածավալ ռազմական բախման հավանականության անկումը, Թուրքիայի հետ հարաբերությունների կարգավորման ուղղությամբ տարվող աշխատանքները, արտաքին կապերի դիվերսիֆիկացիան և երկրի անխափան ներքաղաքական կայունությունը։
Անդրադառնալով մակրոտնտեսական սպասումներին՝ գործակալությունը 2026-2027 թվականների համար կանխատեսում է 5-ից 5,5 տոկոս կայուն տնտեսական աճ: Ակնկալվում է, որ այս ցուցանիշը կապահովվի ներքին կայուն պահանջարկի, ակտիվ ներդրումների, պետական ծախսերի ընդլայնման և ծառայությունների ոլորտի շարունակական զարգացման հաշվին:
Վարչապետը հիշեցրեց, որ 2018 թվականից ի վեր (բացառությամբ 2020 թվականի) տնտեսական բարձր աճի ֆոնին վերլուծաբաններին մշտապես հուզում էր այն հարցը, թե արդյոք այդ թվերն իսկապես մեծացնում են տնտեսության հենքն ու հնարավորությունները:
«Շատ կարևոր է, որ միջազգային հեղինակավոր կառույցն արդեն իսկ արձանագրում է՝ Հայաստանի տնտեսության ներուժն ուժեղացել է, և սա չափազանց կարևոր փաստագրում է»,- ընդգծեց Նիկոլ Փաշինյանը։
Որոշման գործնական նշանակությունը պարզաբանեց Կենտրոնական բանկի նախագահի տեղակալ Հովհաննես Խաչատրյանը։ Նա շեշտեց, որ սուվերեն վարկանիշն ուղղակիորեն ազդում է միջազգային ֆինանսական կառույցների կողմից ՀՀ կառավարության վարկավորման պայմանների վրա։ Որքան բարձր է վարկանիշը, այնքան ցածր և շահավետ են տոկոսադրույքները։ Որպես օրինակ՝ նշվեց, որ ներկայումս Հայաստանը միջազգային շուկայից միջոցներ է ներգրավում ամերիկյան գլոբալ խարսխային տոկոսադրույքից ընդամենը 1,5-ից 2 տոկոսով ավելի բարձր արժեքով:
Ըստ ԿԲ պաշտոնյայի՝ սա պատմականորեն աննախադեպ փոքր տարբերություն է, ինչը վկայում է այն մասին, որ Հայաստանի առանձնահատուկ ռիսկայնությունն այսօր հասել է իր պատմական նվազագույն մակարդակին:
