Կլինի դիկտատուրա, եթե Փաշինյանը վերընտրվի. Մարուքյան

«Լուսավոր Հայաստան» կուսակցության նախագահ Էդմոն Մարուքյանը կարծում է, որ ՔՊ–ի առաջնորդի վերընտրվելը կհանգեցնի բռնությունների ավելացմանը, ազատությունների սահմանափակմանը։

«Հիբրիդային այսօրվա կիսաավտորիտար ռեժիմն այդ դեպքում դառնալու է ֆունդամենտալ ավտորիտար ռեժիմ։ Մենք արդեն տեսել ենք, թե 3–րդ ժամկետով ընտրվելն ինչերի կարող է հանգեցնել»,–կառավարության շենքի մոտ իր քարոզարշավի ժամանակ հայտարարեց Մարուքյանը։

Նրա խոսքով` Փաշինյանն է պատասխանատու այն բռնությունների և հարձակումների համար, որոնք այս օրերին իրականացվում են քաղաքական տարբեր ուժերի ակտիվիստների նկատմամբ։ Շեշտում է` երկրում իրականացվում է ընտրովի արդարադատություն. եթե իշխանության նկատմամբ ինչ-որ բան լինի, արագ արձագանք կա, մինչդեռ երբ խոսքը որևէ ընդդիմադիր ակտիվիստի մասին է, «ամիսներով քննում են, մինչև այդ գործը փակեն, ծածկադմփոց անեն»։