TRIPP նախագծով ՀՀ սահմաններին կներդրվեն բարձր տեխնոլոգիաներ

«Թրամփի ուղի՝ հանուն միջազգային խաղաղության և բարգավաճման» (ԹՐԻՓՓ) նախաձեռնության շրջանակներում Հայաստանը նախապատրաստվում է սահմանային և մաքսային հսկողության համակարգերի արմատական տեխնոլոգիական վերազինմանը։

Վարչապետ Նիկոլ Փաշինյանը ՏՏ, արհեստական բանականության և հեռահաղորդակցության ոլորտի ներկայացուցիչների հետ հանդիպմանը հայտնել է, որ նորագույն լուծումները կկիրառվեն ոչ միայն նոր տարանցիկ ուղիներում, այլև հանրապետության բոլոր անցակետերում, այդ թվում՝ «Զվարթնոց» օդանավակայանում։

Ենթակառուցվածքների արդիականացման համատեքստում կառավարության ղեկավարն առանցքային է համարել կենսաչափական անձնագրերի համակարգի ներդրումը, որը պետք է էլ ավելի դյուրացնի քաղաքացիների և բեռների միջազգային տեղաշարժը։ Այս գործընթացը հաջորդում է հունվարի 14-ին Վաշինգտոնում կայացած բարձր մակարդակի հանդիպմանը, որտեղ ՀՀ ԱԳ նախարար Արարատ Միրզոյանն ու ԱՄՆ պետքարտուղար Մարկո Ռուբիոն հրապարակել են ծրագրի իրականացման շրջանակը։

Նախագիծը միտված է Հայաստանի տարածքով անխոչընդոտ, մուլտիմոդալ տարանցիկ փոխկապակցվածության հաստատմանը։ Այն կոչված է կապելու Ադրբեջանի հիմնական մասն իր Նախիջևանի Ինքնավար Հանրապետության հետ՝ ստեղծելով Տրանս-Կասպյան առևտրային երթուղու կենսական օղակ, ինչը Հայաստանի Հանրապետության համար խոստանում է տնտեսական և լոգիստիկ փոխադարձ առավելություններ։