Ձեր քարտը Armed-ում է. ստեղծվել է ապահովագրության էլեկտրոնային ռեգիստրը

Համընդհանուր առողջապահական ապահովագրության ներդրմանը զուգահեռ՝ կառավարությունը գործարկում է համակարգի թվային «ողնաշարը»։ Այսուհետ քաղաքացիները կկարողանան առցանց հետևել իրենց ապահովագրական կարգավիճակին և հասանելի բուժծառայություններին մեկ միասնական հարթակում։

Հունվարի 8-ի նիստում գործադիրը հրատապ կարգով հաստատել է քաղաքացիների բժշկական պատմությունների ռեգիստրի ստեղծման որոշումը։ Այս քայլն անհրաժեշտություն էր, քանի որ հունվարի 1-ից պաշտոնապես մեկնարկած ապահովագրական համակարգը չի կարող գործել առանց տվյալների միասնական բազայի, որտեղ կհավաքագրվեն պացիենտների անձնական և ոչ անձնական տվյալները։

Նոր ռեգիստրը ինտեգրվելու է պետական այլ շտեմարանների և էլեկտրոնային առողջապահության Armed համակարգի հետ։ Սա քաղաքացիների համար ստեղծում է հարմարավետ գործիքակազմ. մուտք գործելով հավելված՝ յուրաքանչյուր ոք կկարողանա տեսնել՝ արդյոք ինքը ապահովագրված է, ինչ ծառայություններ են իրեն հասանելի և ինչ է ծածկում պետությունը։

Բացի քաղաքացիների հարմարավետությունից, ռեգիստրը կարևոր գործիք է Առողջապահության նախարարության ձեռքին։ Գերատեսչությունը հնարավորություն կստանա մշակելու հավաքագրված տվյալները, ինչը թույլ կտա վերլուծել իրավիճակը և շարունակաբար բարելավել համընդհանուր առողջապահական համակարգի որակը։