Մինչև տարեվերջ Մինսկի խումբը կլուծարվի, և բանակցային փաստաթղթերը կհրապարակվեն. Փաշինյան

Վարչապետ Նիկոլ Փաշինյանը խորհրդարանական ճեպազրույցում հիշեցրեց, որ դեռևս հայտարարել է՝ բանակցային փաթեթը կհրապարակի մինչև տարեվերջ՝ նշելով, որ դա ունի իր պատճառը։ «Եթե մի քիչ մտածեն, կհասկանան, թե ինչու հենց հիմա և ինչու մինչև տարվա վերջ», — ասաց նա։

Հարցին՝ արդյոք դա արվելու է առաջիկա ընտրություններին ընդառաջ, Փաշինյանը պատասխանեց. «Ո՛չ, ընտրություններին ընդառաջ չէ։ Բանն այն է, որ այդ փաթեթի տերը միայն մենք չենք։ Ենթադրվում է, որ մինչև տարեվերջ դե յուրե ԵԱՀԿ Մինսկի խումբը կլուծարվի, և այդ բարոյական ու քաղաքական սահմանափակումը կվերանա։ Այսինքն՝ այդ սուբյեկտը այլևս չի լինի, և մենք կարող ենք ազատորեն հրապարակել այդ փաստաթղթերը»։

Նա նաև անդրադարձավ ՀՀ երրորդ նախագահ Սերժ Սարգսյանի նամակին, որը, ըստ ամենայնի, առնչվում է բանակցային գործընթացին։ Փաշինյանի խոսքով՝ ինքը հանձնարարել է սկսել նամակի գաղտնազերծման գործընթացը։ Վարչապետը չի ներկայացրել մանրամասներ, միայն նշել է, որ նամակը հասցեագրված է այլ երկրի ղեկավարի։